Ua toe fafagu e le Labour i loto o tagata Pasefika le amataga o lana tautua ma lana tulai mai i le faatinoina o ona tiute tauave talu ona faavae mai le Pati a le Labour. O lea faamoemoe sa tutulai ai le Taitai o le Labour le susuga ia Andrew Little ma nisi o ona sui faipule, Tofa Su‘a William Sio, Jenny Salesa, Poto Williams, Carmel Sepuloni faapea ma le faipule ia David Cunliffe, e faatino se mafutaga poo se faatasiga i le hall a le May Road Primary School i Mt Roskill mo tagata Pasefika.
O le sini ma le faamoemoe autu o lenei mafutaga se‘i toe faailoa i tagata Pasefika galuega a le Labour na amata mai ai lava talu ona faavaeina lenei pati i totonu o Niu Sila, ma o loo faaauau pea e oo mai i le taimi nei.
Sa amata lenei faamoemoe i le sauniga lotu na taitaia e le susuga i le faafeagaiga ia Rev Lucky Slade, ma saunoa faafeiloai ai loa Afioga Lemalu Herman Retzlaff i le mamalu o tagata Pasefika sa auai, o ia foi sa faatautaia le faagasologa o le polokalame.
O le saunoaga a le taitai a le Labour ia Andrew Little na tatala ai le faamalamalamaina o lenei faamoemoe. Ae o le Tofa Su‘a William Sio na ia fofolaina le talafaasolopito i le auai ai o tagata Pasefika i totonu o le Vaega Faaupufai a le Labour.
Auā e fai lava si mamao i tuā o le amataga mai o fesootaiga a le pati ma Samoa, e amata mai lava i le taimi a o lei tutoatasi Samoa, a o avea le susuga ia Harry Holland ma taitai o le Labour, o se tasi foi o tagata sa telē lona sao i le finauina o le puipuia o aiātatau a Samoa, i lana mau sa finafinau ai i lena vaitaimi e tetee mai ai ia Siamani faapea foi ina ua taunuu atu le pulega a Niu Sila i Samoa.
I se feiloaiga a le tusitala ma le susuga i le alii Faipule, na saunoa ai Su‘a ma ia faailoa ai foi le vaitaimi na ofi ai o ia i totonu o lenei pati i le tausaga 1986, faaasi ai ma nisi o tina ua fai i lagi le folauga, ma le naunautaiga i lena vaitaimi ina ia iai se sui o le Pasefika i totonu o le Palemene.
Ina ua litaea le susuga ia Colin Moyle sa avea ma taitai o Otara i le tausaga 1990, sa tulai mai le Afioga Taito Philip Field i le tausaga e 1993 ina ua manumalo ai i le nofoa. O le talitonuga o Su‘a, i lena vaitaimi e sao loa se sui se toatasi a le Pasefika i totonu o le Palemene ua faigofie foi ona ofi atu ai ma isi sui aemaise lava i Aukilani i Saute i le mea o loo toatele ai o tatou tagata, ma sa taunuu lava nei faamoemoega uma. O le susuga ia Vui Mark Gosche na sosoo atu ai, o le tamaitai faipule ia Luamanuvao Winnie Laban faatasi ai ma le Tofa Su‘a William Sio.
Sa faapea foi ona fofola e le afioga i le faipule i tagata Pasefika le sao o tagata matutua sa iai i lena vaitaimi, e pei o le tina ia Luisa, ma Lealaiauloto Sene o i latou ia sa taulamua i le pati i na vaitaimi. O le 2002 na faia ai le faatoesega a Helen Clark ia Samoa ona o le leaga foi o le faatinoina o le pulega a Niu Sila i lena vaitaimi. O le tausaga ua mavae na tulai mai ai sui e toalima o le Pasefika ua manumalo mai i itumalo, sa faataoto ai foi le mafuaaga e ala ai ona malosi le lagolago a o tatou atunuu i le pati o le Labour, ona e lē gata i fesootaiga i talafaasolopito ae pei foi o le pati lea sa tu malosi e lagolago le tele o mataupu e aogā mo le agai i luma o le soifuaga o tagata Pasefika i Niu Sila, i mea tau i le tamaoaiga ma galuega i totogi o tagata faapea foi i fale faatasi ai ma mea tau i femalagaa‘iga.
O le taimi nei, o mataupu lava nei o loo fagufagu pea mo tagata Pasefika, galuega ia lelei totogi, ia tofusia uma tagata ma fale e nonofo ai, ia taugofie, aemaise lava i le soifua maloloina. O se suiga ua iai nei vaitaimi mai aso la, ua tele atu tupe ua maua e fanau i nei vaitaimi, auā ua lelei fanau i taaloga ua polofesa le tele o fanau, ua loia isi, suetusi isi.
O le lui a le faipule i totonu o le pati, ua tatau ona saili ma vaavaai mamao i se isi suiga ma nisi auala e tatau ona agai i ai le pati.
O le saunoaga a le faipule ia Poto Williams i le tele o le suiga ua iai, e tatau ona taofi mau ia tatou value, ia aua ne‘i galo le tāua o tatou aiga, tāua o ekalesia, aua ne‘i galo le gagana ma le aganuu, sa faapea foi ona faaaopoopo atu ai ma Carmel Sepuloni ma Jenny Salesa.
Sa tatala le avanoa i le mamalu o le atunuu na auai, e fai atu ni o latou manatu ma ni fesili i sui o le Labour i nisi mea o latou mananao ia faaaofia i atinae tapena a le Labour. Ma o nisi o finagalo sa faaalia i lea aso, ia tatau ona faaaofia ai le autalavou i nisi o polokalame a le Labour auā o le tele o mea e fai o loo agai lava i tagata matutua, ae ua tatau ona maua ni avanoa poo ni sao o le autalavou i totonu o le Labour.
Sa faaalia foi finagalo o le taitai o le Local Board a Magele ia Lemauga Lydia Sosene ma Faanana Efeso Collins o le Local Board a Otara-Papatoeto.
O lea e sauni le faigapalota a pulega o faigamalo laiti a le Auckland Council, ma ua tatau ai foi ona ofi ai i totonu ni taupulaga talavou.
E silia i le 700 tagata Pasifika sa auai i lenei feiloaiga i le Aso Toonai talu ai, ma sa molimauina ai le toatele o le vaega talavou sa auai.
