Ua ono nei tausaga talu ona faagasolo le polokalame o le Gamble Free Day poo le United Communities Event i le itu i Saute o Aukilani, ma o lenei faamoemoe o loo faatinoina lava ia Setema i tausaga taitasi. O se polokalame o lo taulamua ai le Mapu Maia faatasi ai ma nisi o auaunaga e pei o auaunaga tau le soifua maloloina.
O le Aso Toonai na toe tumutumu ai foi le Manukau Square i tagata o atunuu eseese e faailoa a latou gagana ma lanu, ua lē gata i tagata Pasefika, o papalagi, o Maoli faapea ma tagata Asia.
E ui ina toulu timuga i lea taeao ae sa lē tuua ai lava le agai atu o tagata e molimau le faamoemoe e pei ona faailoa ai nisi o taleni ma faafiafiaga a fanau. Sa auai le au faafiafia a alo ma fanau Samoa o loo aotauina i le Iunivesite a Aukilani, o le hip hop a fanau Maoli o le aufaafiafia mai Asia sa sui fefiloai ai le polokalame o le aso, ma sa faafaigofie ai foi ona momoli le feau, auā o le tāua lava o lenei Koneseti ma faafiafiaga ina ia avatu ai le feau tāua i alo ma fanau Pasefika ma tagata o loo nonofo i le itu i Saute o Aukilani, pe faapefea ona fesoasoani e faaitiitia aafiaga e tulai mai ona o taaloga faitupe. Auā o taaloga faitupe e pito sili ona lilifa i ai le Mapu Maia o masini poka ma TAB. O taaloga nei o loo matuā iloga ona mafatia ai tele tagata Pasefika ma isi atunuu o le lalolagi. E silia i le 500 tagata sa molimauina lea polokalame, auā sa tele meaalofa sa tufatufaina ai, o vouchers eseese sa maua ai, faatasi ai ma le sausage sizzle sa tufa ai auā le fofoga taumafa o le atunuu.
Ae sa aofia ai foi ma auaunaga eseese a le Soifua Maloloina e pei o le vaega o loo galulue mo le avatuina o fesoasoani mo le gasegase o le gugu, o auaunaga o le malosiaga o le eletise faapea nisi o kamupani, ae o le auga ma le sini autu o le auai o nei tautua, o le sosoo tau‘au lava ma fesoasoani i le koneseti o loo taulamua ai le Mapu Maia.
O le tāua foi o lea faamoemoe ona sa iai nisi sa fesootai atu i le ofisa e ala ia latou faafitauli, auā sa fesoasoani le leitio i le faailoaina o le polokalame ma faafaigofie ona maua ai e tagata le aveai.
Ma o se avanoa lelei ua faigofie ai ona maua e tagata le fesoasoani ma ua siisii ai foi i luga le tulaga o le faamāmāina o le mafatiaga o loo feagai ma tagata i taaloga faitupe.
