Sa iai le faamoemoe e osia le Misasa faapitoa mo tupulaga talavou ale Puleaga Katoliko i Kuinisielani, peitai na valaaulia faapitoa ele afioga ia Patele Epati Tamati le Autalavou e lagiina viiga ole sauniga ole Misasa ile Aso Sa aso 6 o Aokuso ile Palisi a St John Vianney.
Ose faamanuiaga i loto ma agaga ole Palisi ina ua maua le avanoa e faafofoga ai i siufofoga malie ole aufaipese ale autalavou ale Puleaga Kuiniselani, e pei ona latou usuina ma lagi viiga uma ole Misasa Paia.
Sa faapea foi ona faatinoina le momoliga ole taulaga i faiga faa-Samoa. O taimi uma e faatino ai le momoliga ole taulaga i faiga faa-Samoa e mataina ile vaai a papalagi, ma i latou e le masani ona vaai i nei faatinoga mamalu oloo faatāua ai le aganuu e momoli ai le taulaga ile Atua. O nei faatinoga na’o ekalesia Samoa e masani ai.
Na ta’ua ele afioga ia Patele Epati Tamati, e tele taimi e valaaulia faapitoa ai le autalavou e faaaoga le latou taleni aemaise lava ile peseina o viiga ole Atua ma ose fiafiaga foi lea ile tupulaga talavou, e iai foi taimi e valaauina ai latou te pepese ma lagi viiga i nofoaga o Tamaitai Sa, faapea le nofoaga o Monike.
Oloo iai le faamoemoe oloo tapena atu iai le autalavou ale Puleaga Katoliko a Kuiniselani ile masina o Setema ise soo ma le autalavou mai Sini i Niu Sa Uelese lea e fuafua e faataunuu mai ile aso 29 o Setema, ma faagasolo ai polokalame ile weekend atoa.
Ose avanoa lelei e feiloai ma mafuta ai tupulaga talavou ona ole Talalelei. Oloo faalauaitele le valaaulia i tupulaga talavou ina ia auai atu e mafuta faatasi ai ma molimauina polokalame o lea aso faapitoa.
Faamanatu atu foi ile paia ma le mamalu o Samoa uma ile ekalesia Katoliko a Kuiniselani, ole a faia le Misasa Samoa e taitaia ele afioga ia Patele Epati Tamati Aiolupotea ile Aso Sa, 13 o Aokuso i Deception Bay, tuatusi 54 Thompson Street, Deception Bay 4508. Ole taimi amata ole Misasa ole 10 ile taeao.
