O le faatagisia mai e le nuu i Samoa o se fesoasoani mo le galuega o le malumalu mo tapuaiga, na mafua ai ona ofaga potopoto i le Aso Toonai na se‘i mavae atu nei, le paia ma le mamalu o le afioaga o Fogasavii mai le itu Salega o loo aumau ma papaaao i Sini nei, mo le faamoemoe o le tusigaigoa.
O le susuga lava i le Faafeagaiga ia Rev Mataio Faaletonu Matai ma lona faletua na malaga mai ma le Afioga Fonoti Isaako mo lenei faamoemoe. O se aso felanulanuai mo le aai o Cabramatta lea e faamautu ai tagata Asia ma o le Hall a le PCYC a Cabramatta na feiloai ma velo ‘aso nai aiga, uo ma ē masani i lea faamoemoe.
O le itula e sefulu i le taeao na amata ai i se sauniga lotu ma le mālū o le taeao a o gasolo atu pea tagata sosoo ai loa ma le faalauiloaina o peleti a aiga eseese faapea le aofia. Sa vaaia foi le lagolago o sui o le Sinoti a Sini mo le malaga na asa mai le vasa loloa mo le fia maua o se fesoasoani.
O le afioaga o Fogasavaii sa tulai mai ai se tasi o Faipule aupito loa lana tautua i le itumalo mo le luasefulutasi tausaga le Afioga lea a Leilua Manuao ua ritaea nei. E soifua mai ai foi se tasi o toa o le Palemene i le vaitau lenei le Afioga i le Faipule ia Levaopolo Talatonu Vaai.
E ui lava foi o lea aso sa iai foi nisi tusigaigoa sa faia e taulalata atu e pei o le faamoemoe o le EFKS Etena Fou mai Sagafili Mulifanua i Fairfield, ae na vaaia lava le tumutumu o le faamoemoe o Fogasavaii.
O se tasi lenei o afioaga i Samoa na faaleagaina lo latou malumalu i afa na aafia ai le atunuu ma ua moomia lava le toe faaleleia mo tapuaiga.
O le tali atu a le paia ma le mamalu o le afioaga ma le itumalo i Sini nei lea na ausia ai le $102,000 Ausetalia atonu e maua ai le $204 afe tālā Samoa pe sili atu foi e fua i le tau o le Tupe Ausetalia o loo iai nei.
Na taualuga foi lenei faamoemoe o Fogasavaii i faaaloaloga masani a le afioaga mo le paia ma le mamalu o le atunuu na aofia.
