O le suega siamupini a le taaloga o le Jiu Jitsu poo le pii i le faa-Samoa, le taaloga foi lea e sā le tu‘i ma le a‘a, na faataunuuina i le faaiuga o le vaiaso na tuanai atu nei.
O nisi o tamalii o lo tatou atunuu na maimoaina lenei faagatama le afioga ia Toilolo ma le faletua ia Pei Taulapapa. Na o la saunoa i le matagofie o le taumafaiga a se tasi o alo tamaitai talavou o Samoa le tamaitai ia Laura Kleis Faavaoga, o le alo o le susuga ia Siaosi Faavaoga o Tuanai ma Vaigaga, ma le faletua ia Rozae o Vailoa Faleata ma Lepea.
Na faaalia e Pei na amata lē manuia le taumafaiga a Laura i le Aso Faraile ona ua feavea‘i sese pepa ma iu ai ina tauva Laura i le aupaga sese, peitai na lē avea lea ma tulaga na faavaivai ai le teine Samoa. I le taeao o le aso fou le Aso Toonai lea, na tauva ai Laura i le aupaga 71kg ma oo atu i le Final, lea na o la sailia ai ma Lasa Mataia o se tasi o tamaitai Samoa le siamupini, ma faamanuiaina ai Lasa i le pine auro, ae pine siliva Laura.
O le tulaga foi lea na maitauina i le Open Division a le itupa o tamaitai, na sue siamupini ai foi alo tamaitai nei o Samoa, ma toe siamupini ai Lasa Mataia i le pine auro, ae faamanuiaina Laura Faavaoga i le pine siliva. O le tautinoga a Laura, e mitamita ona o lea faatoa tolu masina talu ona koleni mo lenei faamoemoe, ma o loo tele pea avanoa e mafai ai ona manuia atili lona taumafai i lenei faagatama. E momoli le faafetai a le atunuu ma la tatou nusipepa i nei tamaitai Samoa ona o le tauivi tiga i lo laua saili malo.
