O le vaiaso lenei ua faamanatu ai le atoaga o le valu (8) o tausaga talu ona faavae le faalapotopotoga o suesuega faasaieanisi a le atunuu, le SROS lea e faatuina lona ofisa i Nafanua i Vailima.
O lenei faalapotopotoga na faatuina e le Malo ina ia taumafai e faatino galuega o suesuega i le tele o atinae.
Na muamua agai i le sailiga o auala e mafai ai ona gaosi mai ni malosiaga e sui tulaga i le suauu ua tele le tupe e alu ai i le faatau mai, ma o le taimi lenei o le suauu popo lea ua faapea ona faamamā ma ua iai taavale ua amata ona feoai ai i le suauu lenei ina ia taumafai e faaitiitia ai lea faafitauli.
O le isi laasaga o le agai loa e saili isi auala e mafai ai ona gaosi taumafa o loo faatau mai i fafo i laau lava o loo maua i Samoa.
O lea la ua iai le tele o oloa e pei ona iai le falaoamata ua mafai ona gaosi mai i le fua o le ‘ulu, ua iai foi ma le ga‘o e gasese ai taumafa ua mafai ona gaosi mai i le fua o le avoka, ma le tele o isi mau suesuega ua faatautaia i lenei vaega o suesuega.
O oloa e lua e pei ona ta‘ua ua fuafua nei le faamatuu atu i kamupani tuma‘oti i Samoa, i se taimi lata mai e latou te gaosia ina ia tele le ga‘o fai meaai ma le falaoamata e gaosi i Samoa ma faatau atu i fafo.
E lua kamupani na ta‘ua e le afioga Tilafono David Hunter ua talosaga atu ina ia avatu i ai le gaosiga o nei taumafa mo le tupe maua a Samoa i oloa auina atu i fafo, ma e lei ta‘ua mai e Tilafono poo ai ia kamupani ona na ia faaalia o loo tālia le fai i ai o se faaiuga a le kamupani ma le Malo.
O lea faatoa mae‘a ona maua mai foi le faamaoniga o le lelei atoatoa o nei oloa e pei ona aumai i le nofoaga e faamaonia ai nei tulaga i Niu Sila (Accreditation NZ).
O le mautu o lenei faamaoniga o le a leai ai se faafitauli o le taumafai atu o Samoa ina ia faatau oloa nei i le maketi a Niu Sila poo se isi lava itu o le lalolagi, ona o le maualuga o aiaiga a lenei faalapotopotoga i Niu Sila i oloa e tatau ona faatau atu i fafo.
O le falaoamata la ma le ga‘o lea e gaosi i le avoka ia ua faamautu mai le lelei atoatoa mo soo se maketi e faatau ai i fafo atu o le atunuu.
O nisi nei o le tele o galuega ua faatino i lenei faalapotopotoga, ma o totonu o le valu o tausaga talu ona faatuina, ua manino le tele o le manaoga o iai a Samoa ina ia unai suesuega nei aemaise ai foi o le manulauti o le meleniuma ina ia maua pea taumafa i taimi e faaletonu ai tulaga o tamaoaiga o soo se atunuu o le lalolagi ma o le auala lenei ua mafai ona tali atu ai Samoa i lenei itu, o manulauti ia e faagata uma i le tausaga fou e Malo Aufaatasi.
