O le agaga faaeaea e tele ina faatino mo toto, ivi ma aano poo aiga moni ma uo mafanafana, ae i le aumau i nei atunuu aemaise o aai tetele e pei o Melepone, e tumu i tagatānuu o isi atunuu ae faalē toatele ni Samoa.
O taimi uma e logopuialii ai le atunuu e leitio faapea faleoloa Samoa i ni tamalii lauiloa o le a asia le aai ma faalauiloa a latou taleni, o taimi na e tele ina faatino ai le agaga faaeaea o nai o tatou tagata ma sapasapai faamoemoe o tamalii asiasi mai.
Ua lua nei vaiaso talu ona asia e le malaga taamilo a le tamalii pese lauiloa o Eteru ma le faili malosi a le Ifilele le aai o Melepone. Na amata le malaga taamilo lenei mai le Setete o Kuiniselani i le aai o Perisipeni, faasolo ane ai i le aai o Sini, ae o lea ua afea le tamaitai o Vitoria. O le afiafi o le Aso Faraile talu ai na faatumulia ai se tasi o maota o fiafiaga i le pitonuu o Dandenong, i le paia lasilasi o le atunuu na faaalia o latou agaga faaeaea mo lenei tamalii sailimalo. Na faamalieina le faafofogaaga i le siufofoga tagitagi o Eteru, aemaise lava o pese aualofa mo mafutaga e pei ona lausilafia ai.
O le aso na sosoo ai na faataunuu ai lana faafiafiaga lona lua na faia i le pitonuu o Epping. I lea foi vaega o le aai tele, na faaalia foi valevale alofa o le atunuu i lo latou taupati e lagolago le faamoemoe, lea ua a‘e manumalo le tautua a Eteru Tooala ma le Ifilele.
