E ui ua sosoo faia‘ina a Fiti ma Samoa ia la taaloga muamua e lua i Europa, ae ao ona silasila le World Rugby ile aofai o tama taaalo mai le Pasefika oloo i ‘au uma ale kelope. Ua na‘o Argentina, Italia, Sikotilani ma Aferika i Saute, ma Aialani e lei iai se tama mai le Pasefika i ‘au ia.
A‘o ‘au uma e iai Egelani, Iapani, Uelese, Niu Sila, Ausetalia ma le Aeto a Amerika, ua faatumulia i tama taalo e tupuga mai le Pasefika. Ole faitau atoa o tama mai le Pasefika oloo taaalo faavaomalo e 103. I lea faitauga, e 39 tama e tupuga mai Samoa; Fiti e 33 ma Toga na tupuga mai ai tama taalo e 30. E toalua na tupuga mai Noumea oloo taalo mo Farani.
O taaloga mataina a iai tama Pasefika e iai le taaloga a Ausetalia ma Farani. Na sikoa Virimi Vakatawa mo Farani, a‘o Tevita Kuridrani mo Ausetalia. A‘o le taaloga lava lea, ole taimi muamua lea ua pou ai e Samoa le sikalamu a Ausetalia, ile taalo faatasi ai o Allan Alaalatoa ma Scott Sio ile numera 1 ma le 3.
E lei umi se taimi na taaalo faatasi ai, auā o Sio na sui atu i totonu, ae o Alaalatoa na amataina le taaloga ile tulaga masani o Sio. Ae na sui e Sio le alii o James Slipper faatoa alu ai i tua Alaalatoa mo se malologa.
Ile taaloga a Egelani ma Fiti, o alii Toga e toalua, ole auso o Billy ma Mako Vunipola na filifilia malosi mo le ‘au a Egelani. E ui e lei sikoa se tasi o laua ae na vaaia le malolosi o i laua ile taaloga. E tolu sikoa a Fiti ile taaloga lea. E toatasi le alii Samoa na taalo mai ile taaloga lea, o Ben Te‘o sa taalo mo Egelani.
Ole taaloga a Amerika ma Toga, e toafitu alii Pasefika mai le Aeto ile 23 ole ‘au atoa a Toga.
E toaono alii Pasefika na taalo ile taaloga ale All Blacks ma Aialani. Ole toaono lea nai le ‘au ale All Blacks, leai se tasi ile ‘au a Aialani. Peitai, o Aialani oloo faiaoga ai le faiaoga muamua ale Manu Samoa, o Pat Lam. E toafā Samoa (Ole auuso Savea, Faumuina, Lienert-Brown), ma Fekitoa mai Toga e toatasi, ma Waisake Naholo o Fiti na iai ile ‘au ale All Blacks.
Ae ole taaloga ale Manu ma Georgia, ole aofai uma lava ole ‘au ale Manu Samoa e iai i lea aofaiga, o tama ale Pasefika na taaalo lakapi i taaloga Faavaomalo ole vaiaso.
E ao ai ile World Rugby ona silasila i lea tulaga. E tele le sao ole Pasefika ile lakapi ile lalolagi atoa, e ui ile tulaga faaletonu oloo vaaia i ‘au mai le Pasefika. E ao lava ona maua se fofo o lenei faafitauli, auā oloo manuia ai pea Europa, Ausetalia ma Niu Sila, mai tupe maua o taaloga faavaomalo ae tumau pea le mativa o Samoa, Toga ma Fiti.
Pau se laveaiga ole faatalanoaina lea ose ‘au Super Rugby ale Pasefika. Oloo taulamua ai Ben Ryan lea na faiaoga ia Fiti i lea mataupu. O ā faigata ma faafitauli, ae ao lava ona faataunuu se auala e faaleleia ai le lakapi ale Pasefika. Auā e lē o agai i luma ‘au mai le Pasefika, ae oloo faasolo i tua, e pine faamau le tulaga oloo iai nei faia‘ina sosoo a Fiti ma Samoa i Europa. Se‘i vaganā ai Tonga lea na malo ia Amerika ile vaiaso na tea nei.
Aofaiga o alii mai tupuaga Pasefika i taaloga faavaomalo ole Vaiaso
Farani vs Ausetalia (14 alii mai tupuaga Pasefika)
Farani: Sebastian Vahaamahina (Noumea), Uini Atonio (Samoa), Noa Nakaitaci ma Virimi Vakatawa (Fiti)
Australia: Sefanaia Naivalu, Tevita Kuridrani, Henry Speight, Lopeti Timani, Taqele Naiyaravoro (Fiti), Allan Alaalatoa, Scott Sio, Will Skelton (Samoa), Tolu Latu (Toga).
Niu Sila vs Aialani (6)
Niu Sila: Malakai Fekitoa (Toga); Anton Lienert-Brown, Julian Savea, Charlie Faumuina, Ardie Savea (Samoa); Waisake Naholo (Fiti) Aialani: 0
Uelese vs Iapani (5)
Wales: 0; Iapani (5): Timothy Lafaele, Malgene Ilaua (Samoa), Amanaki Mafi, Samuela Anise, Amanaki Lotoahea (Toga)
Toga vs USA (30)
USA (7): Joseph Taufetee, Samu Manoa, Martin Iosefo, Mike Te’o, Thretton Palamo (Samoa), Samu Durutalo (Fiti), Langilangi Haupeakui (Toga)
Toga: 23
Samoa vs Georgia (23)
Manu Samoa atoa.
Fiti vs Egelani (26)
Fiti 23; Egelani 3 Billy Vunipola, Mako Vunipola (Toga), Ben Te’o (Samoa)
