Ua tele a‘oa‘oga e faia mo alii ma tamaitai pagota poo i latou oloo nofosala ile falepuipui ona o faasalaga ale faamasinoga e mafua ina ua faamaonia o latou moliaga faasolitulafono. E ui ile tele o ia a‘oa‘oga ae e toaitiiti lava sa filifilia e auai.
Ole taimi muamua la lenei ua silia ile 200 le numera o pagota ua latou filifili e auai ile a‘oa‘oga ona e tāua tele mo i latou.
Ole tomai ile faakamuta, ma a‘oa‘oga e toe faufautua ai ini auala e fuataina ai o latou olaga mai solitulafono ole sola ese ma le falepuipui, le tagofia o fualaau ma vailaau faasāina ma le avamalosi, tu ma aganuu faasamoa, o solitulafono tau feusuaiga, ma le gaoi a‘o avea ma tagata faigaluega.
Ole pulea foi ole loto mai le ita ose isi lea o vaega na agai iai a‘oa‘oga na faia ese mafutaga ole atinae o olaga mo le toe fuataina. Faaalia ele Komesina ole pulega o falepuipui le afioga Taitosaua Winterstein, ose matatia lea ua ausia ele falepuipui i Tafaigata ose numera toatele o alii ma tamaitai nofosala ua mananao e auai i a‘oa‘oga faapea.
Ose tasi lea o polokalame oloo faatino ele pulega ole falepuipui ole tapenaina o a‘oa‘oga e toe fofola ai ni fautuaga e tapui a‘i soifua ole aunofosala ina ia mafai ona tetee faaosoosoga ale fili e oo ai ina faia le filifiliga sese ma aafia ai i soligatulafono. Faaalia ese tamaitai leoleo ole falepuipui e lei filifilia nisi o pagota e mamafa solitulafono oloo nofosala ai, ae o pagota na auai sa ave lava iai le avanoa e filifili ai pe fia auai pe leai.
Ole alii pagota o Daniel Vailopa e sola soo ma le falepuipui ae sa auai ile a‘oa‘oga sa fofola ai fautuaga i upu ma tala e mafai ai ona taofia lea tulaga.
Ole alii pagota o Lauititi Tualima ose tasi foi e sola soo ma oloo tuli le faasalaga ile faia ose faiaga aiga fai faamalosi ise tamaitai Ausetalia e lei auai ile a‘oa‘oga. Faaalia ese leoleo ole falepuipui e lei filifilia ona ole taimi nei oloo nofo ile pasima e tuli ai le faasalaga faatasi ai ma nisi ole aunofosala.
Na saunoa se tasi o tamaitai nofosala e faafetai ile pulega ole falepuipui ile toe tatala ole faitotoa mo i latou e auai i a‘oa‘oga auā a oo ina magalo ma foi io latou aiga, ole a faaaogā ai le silafia ma le tomai ua maua aemaise ole a taofia ai le toe solia ole tulafono na mafua ai ona nofo ile falepuipui.
O lana talosaga ile pulega e manaomia ni masini komepiuta latou te faaaogā i taimi o a‘oa‘oga faapea, aemaise ia avatu se tanoa palu ‘ava ma se fue ma se tootoo e fai ai a latou a‘oa‘oga ile aganuu faasamoa.
