“O fanau o le tofi mai le Atua”
Ua savalivali atu ina selau lima sefulu tausaga o faamanatu pea e Samoa i ekalesia eseese ua latou faamanatuina i tausaga taitasi le Aso Sa paepae o le fanau poo le Lotu a Tamaiti. O le lotu na amatamea ai le ekalesia Faapotopotoga Kerisiano Samoa le EFKS i le taimi o misionare papae a le Sosaiete a le Lonetona Misionare le LMS, ae o lea ua apo uma e isi foi ekalesia Kerisiano i le atunuu, ona o le tāua tele o lea aso e faasino i le fanau e faatāua ai i latou.
O aoaoga a le lotu kerisiano ma isi foi tapuaiga e faatāua tele ai fanau ona o le faatumutumuga o galuega a mātua, auā o le meaalofa sili mai le Atua. O nei aso i le faamanatuina pea o lenei Aso Sa mo le fanau, o loo iai pea ma fesili e tele o loo tuufesilisili ai pea le mafaufau, e pei o le faamata o toe maua pea e le tāua o le aoaoga faakerisiano le tāua tele o tamaiti pe a tatou vaai ma silasila i le tele o le mau soligatulafono ua faia e nisi ua aafia ai le ola mu‘amu‘a o le fanauiti.
E lē tau faailoaina ia mau soligatulafono, auā ua lasi ma atulasi faamatalaga e faia i lea tulaga aemaise o le galuega tau logologo a tusitala ma le aufaasalalau o loo puaina atu i fafo mo le silafia e tagata, mataupu eseese e faasino i ia solitulafono ma le aafia ai o fanau.
Pe faamata la o silasila i ai le aufaigaluega tala‘i o le talalelei i nei aafiaga o fanau, ma agai i ai ni polokalame e tau fofo ai? O le Aso Sa o le fanau i lenei tausaga, e lē ese mai isi tausaga ua mavae, auā o tala ma tauloto a le fanau sa faafofoga ma silasila i ai, sa molimoli mai ai ni feau tāua mo mātua aemaise o le lautele o tagata.
O le isi lea fesili tele, pe faamata ua na ona tatou faafofoga ma faalogologo i ai, ae ua lē lagonaina ona ua pei o se mea ua fai masani lenei aso o le fanau, ae tutupu pea faaletonu e aafia ai le fanau? O loo tofu uma i tatou ma tali o na fesili aemaise o lagona faaalia, ae o le Aso Sa o Tamaiti ua mavae atu nei, sa asia ai e le tusitala le ekalesia Metotisi i Sasina o loo tausia e le susuga i le faafeagaiga o Poasa ma le faletua o Feao.
E maeu le matagofie o tapenaga a le fanau aemaise o le faafeagaiga ma lona faletua ma le vasega o alii ma tamaitai faiaoga Aso Sa. O le itu ua molimauina, o loo iai pea le lima vaivai i nisi o mātua i lea itu o le motu o Savaii.
E taunuu le tusitala ma lana aumalaga o loo feagai le faletua ma le galuega o le suisuiga o lavalava o nisi o le fanau a le aulotu.
O le tala a le faafeagaiga le susuga Poasa, o nai mātua ia e vaivai le seleni e sili ona gafatia le faatau o ie papae ona avatu lea e su‘i ai ofu o le fanau.
O aga ma faiga ia sa tatou vaai i ai i tausaga e tele ua mavae i le lima vaivai o aiga aemaise o mātua. O aso nei i le toatele lava o mātua i lo tatou atunuu ua gafatia le tau o lavalava ua tai selau pe sili atu foi le tau aemaise o teuga e pei o seevae.
O le tasi itu ua molimauina i Lotu a tamaiti i nei aso, ua faaleai faiga sa iai o le faasolo o vasega o tauloto ma tala lea sa uumi ai sauniga. O le matau i le tapenaga a le fanau i le ekalesia Metotisi a Sasina, sa faatino tala i pesepesega faaleagaga e faaaogā i ai taga poo siva faaleagaga poo siva foi faaevagalia.
O ni suiga ia ua vaaia ua pei ua vave ma puupuu ai tapenaga a le fanau, ae uma ane foi e leai se vaivai o loo fia maimoa pea i tala ma tauloto. O le itu i taumafa tasi lea suiga tele, ona o faitoonai a le fanau sa afea ai le maota o le galuega, o moa papalagi lava, o taumafa e pei o sosisi, ma isi taumafa ua gafatia e seleni i nei aso auā sa le maua i tausaga ua mavae i toonai o le lotu a tamaiti.
Ua tele taumafa eseese ma ua saoasaoa ai foi ma le mau faama‘i ua aafia ai le ola o fanau aemaise o le soifua maloloina o o tatou tagata. Atonu tasi lea itu ua tatau ona silasila i ai ekalesia eseese, ia faamamafa ia latou feau molimoli o le talalelei le tāua o le taumamafa i meaai e paleni ma fetaui ma le ola maloloina, ae lafoai meaai ua tatou mama‘i ma gasegase ai, aemaise foi o le tatou faapelepele ia tatou fanau o loo ola ma tutupu a‘e ia aua nei aafia i ni faamai ua tatou maua ai nei ona o taumafa.
