Ua lua tausaga talu ona faamatuu mai le fesoasoani a le Faletupe o le Lalolagi e faaauala mai i le Matagaluega o Tupe ae faatino e le Matagaluega o Puna‘oa Faanatura ma le Siosiomaga. O le fesoasoani lea e totogi ai e le Faletupe o le Lalolagi le faatūina o ni nofoaga e faamili ai laau eseese mo le taumafaiga ina ia toe totō ma ia faaola lelei vaomatua o Samoa.
O afioaga ua tuufaatasi i itumalo ma ua faatamoe ai loa lenei taumafaiga. E aofia i le fesoasoani le fausia o nofoaga nei e pei ona ta‘ua ma ua aumai ma laau eseese o le a faapea ona totō i vaomatua o nei itumalo auā le mautinoa e tele laau o le a totō i Samoa i nei nofoaga faasao. E lē o toe po malae i le tāua tele o lenei taumafaiga auā o Samoa e laitiiti lava ona vaomatua. O le tulaga faaletonu foi lena ua vaaia ai le faaleaga o nofoaga o loo tapue ai le suavai, sola le tele o vai ona ua solo le eleele ma ua faaleagaina uma ai vaitafe ua palapala.
E lē gata i lea ua leai ni laau tetele nei ona e tele ina ta i lalo ae faamamā ai nofoaga mo ma‘umaga ma isi atinae a le atunuu. O le taumafaiga la lea ua savali nei ua silia i le lua tausaga ua toe unai ina ia agai Samoa e toe totō vaomatua, ia mafai ai ona tatali suiga ogaoga o le tau ua matauina nei ae lē gata i lea, o le lelei o vaomatua, o le maua foi lea o nofoaga e ofaga ai le tele o manulele o Samoa lava ia ua mou mālie atu lava.
E telē le galuega ae e tele foi itumalo ua faapea ona tali mai ina ia mafai ona faatino ai faamiliga o laau i o latou fanua ma eleele. O le faatāua ina ia mafai ona ave i pulega a alii ma faipule le pulea ma le faasao o o latou lava vaomatua e pei ona ta‘ua i le amataga mai o lenei polokalame. Ua iai aoaoga ua faamalamalama ai i le mamalu o sui o afioaga o loo i totonu o lenei polokalame, le fuaina o eleele ia ua ta‘ua o vaomatua o nuu ina ia malamalama lelei ai i le faataatiaga ua iai eleele o vaomatua faasao.
O le atu Safata la na agai i ai le Matagaluega o Puna‘oa Faanatura ma le Siosiomaga i le faaiuga o le vaiaso na tea nei mo aoaoga faaauau. O le aoaoga na faatautaia o le faatinoga lea o le totōina ma le faamiliga o laau o le a faapea ona totō i vaomatua o lea itumalo. O afioaga o Fusi, Nuusuatia faapea ai Lotofagā ia na auai uma o latou sui i lenei aoaoga ma o le faatinoga lenei o le galuega ua mae‘a a‘oa‘oina i latou lava nei o sui o nuu, i le faataatiaga o faafanua o le a totō ai. Sa faapea foi ona auai atu ai ma le Matagaluega o Faatoaga ma Faigafaiva ona o le manaoga ina ia faaopoopo i galuega nei a afioaga togalaau ‘aina ma togalaau faisua ina ia mautinoa, e lē gata ina mautu le faasao lea ma le atiinae o le vaomatua ae ia lava foi taumafai e ala i togalaau nei ma o faamiliga foi o fualaau faisua eseese na agai i ai lenei aoaoga.
O nofoaga ia ua amata tuu i ai laau o le vaomatua ua faaavanoa foi ma vaega mo togalaau nei. Na faafetaia e sui o afioaga nei aoaoga ona o le mau, o le tele o taimi e tuu atu ai atinae nei, ae e lē lava faamatalaga ma aoaoga ina ia manino i latou e faatinoa nei taumafaiga i ni iuga lelei ma ia fua mai galuega ua faatino nei. O lenei atinae na amata mai lava i le tausaga e 2011 ma o le tausaga na tea nei na faatoa mae‘a ai loa ona fausia fale laau mo itumalo eseese lea e aofia ai fale laau e 14 i Laulii e oo atu i Falevao. E tolu (3) fale laau i Safata ma fale laau e vau (8) ua faatutū i le va lea o afioaga mai i Iva seia oo atu i Fata i le motu tele i Salafai.
