O le Palemia ma Minisita o lana Kapeneta faatasi ai ma le Haikomesina o Niu Sila mo Samoa ua faamavae le susuga David Nicholson i le suaina o le eleele e amata ai le fesoasoani a Niu Sila o le faamatagofie o luma maota o le Malo i le eleele fou agai atu i le uati i le taulaga o Apia

O le Palemia ma Minisita o lana Kapeneta faatasi ai ma le Haikomesina o Niu Sila mo Samoa ua faamavae le susuga David Nicholson i le suaina o le eleele e amata ai le fesoasoani a Niu Sila o le faamatagofie o luma maota o le Malo i le eleele fou agai atu i le uati i le taulaga o Apia

E sili atu ona ‘anoa, mapo ma u’a lelei le aoga o fesoasoani a le Malo o Niu Sila mo Samoa faatusa i fesoasoani a isi atunuu i fafo e pei o Saina. O le faamatalaina lea o fesoasoani a Niu Sila mo Samoa e le alii Hai Komesina o Niu Sila mo Samoa o David Nicholson i sona finagalo i luga o le leitio a Niu Sila i le Pasefika.

O le finagalo o Nicholson na ia ta’ua ai o lona atunuu e pito itiiti ana fesoasoani i le tulaga o galuega tetele ae o fesoasoani a lona Malo o loo pito malosi i le atinae o tagata tafafao. O le vaiaso ua mavae na suaina ai le palapala e amata aloaia ai se galuega tele e 10 ma le afa miliona tala lona tau ua faatupe e Niu Sila mo le poloketi o le faatamagofieina o foliga o le taulaga o Apia poo le Apia Waterfront Project.

Ua vivii e le Palemia susuga Tuilaepa lea fesoasoani ona o le a suia ai vaaiga i nofoaga tu lata i le sami o le taulaga o le atunuu. O Niu Sila o le a feagai ma le faamatagofieina o luma maota o le Malo agai atu i le uati tele i le taulaga. O le a toto ai togalaau ma fau ni auala savali ma o le a toto ai foi niu teu fanua ma o le a fou ai nisi vaaiga i lo tatou laumua o Apia.

O Saina le isi fesoasoani i lea galuega ae o le eleele atoa i tua o le maota o le Malo o le a fausia ai se malae taaalo mo le fanau, o se nofoaga e fai ai faafiafiaga, faapea ma ni faleaiga o le a iai. Pe a tatou fua i vaaiga o iai nei lea nofoaga o le a tele lava se suiga o le a iai aua o le vai o loo i tua o lea nofoaga o le a fausia e avea o se vai taele mo tagata.

E amata mai Mulinuu faasolo ane i Sogi taunuu ane i le taulaga ma alu atu i Matautu tai seia oo i Taumeasina o vaega uma o le taulaga o le a aofia i le galuega o le toe fausia faamatagofie o vaega tu matafaga ma le sami o le taulaga o Samoa. Ua sa’o ai le agaga ua a’e i lenei taimi, ua tele lava le suiga o Samoa pe a tino mai lea galuega tele.

Ua faafetai le Palemia ia Niu Sila e ala atu i le Hai Komesina mo Samoa. Ua faafetai foi i le sa avea ma Pulenuu o Aukilani o Len Brown na faamatai i le suafa Tauaa ona na faaalia e le Palemia o ia lea na muamua lava ofo e aumai se fesoasoani i le poloketi. Ua le toe avea Len Brown ma Pulenuu ae ua manatua pea e Samoa lona taimi ma lona sao i le faamatagofieina o le taulaga mo le siitia o le atinae o tagata tafafao mai fafo.