O lea faatoa fā vaiaso ole polokalame a Pacific Gardeners Club ae ua amata ona selesele aiga i fua o a latou faatoaga. E fou lenei taumafaiga ae ua molimauina e lē gata ile tosina iai o lo tatou atunuu ae ole tulai mai ole agaga galulue o o tatou tagata aemaise i aiga ma matua matutua o ē ua penisione ae oloo fia maua ni polokalame e auai iai mo le faaaogā iai o o latou taimi ma maua ai se faamalositino.
E fā vaega ole polokalame, Muamua, fesoasoani mo aiga oloo fia amatalia ni a latou togalaau aina…. Lua, aoaoga mo aiga e iai a latou faatoaga ae fia faalautele atu i isi ituaiga laau ma faatoaga….
Tolu, faavaeina o faatoaga e agai iai aiga i lea pitonuu ma lea pitonuu, Fā, fesoasoani mo le faatuina ose atinae mo tupe maua mai faatoaga ma togalaau.
Ole tasi o itu tāua o lenei polokalame ole mafai ai lea ona maua e o tatou tagata aoaoga ma le fesoasoani i tomai faapitoa tau faatoaga lea ua soosoo tauau ai nei ma le Gardens4Health ose auaunaga e faatupeina ele matagaluega ole soifua maloloina (Ministry of Health) ma le Auckland City Council.
Oloo faasolo pea faatalatalanoaga ma le Gardens4Health mo fesoasoani i tulaga tau faamatalaga i nofoaga e ono maua mai ai supply o fatu laau, tamai laau, faalelei eleele ma isi lava mea e manaomia ile faiga o togalaau. Ae ile taimi nei oloo lagolago faatino ele Health Star Pacific ae faatupe ele Event Polynesia faalelei eleele ma fatu laau ma le faatinoina / totōina o nei togalaau i aiga ua lesitala.
E fā isi aiga Samoa faaopoopo ua faamanuiaina, lea ua iai faatoaga poo togalaau aina ua maea ona totoina. Ole pitonuu o Otara ile aiga o Aemalemalo Taito faapea le aiga o Tiresa Oloapu ile vaiaso atu i tua. Ole vaiaso ua tuanai sa faatinoina ai le galuega ile aiga o Lemamea Iva ma Ina faapea Lemalu Taavili o Mangele, lea foi ua faamanuiaina ai Patosina Winterstein o Panmure.
Faaalia ele faauluuluga poo le taitai o lenei polokalame, Teleiai Edwin Puni… “Ua atoa ai nei le iva o aiga ua iai togalaau mai le tolusefuluono o aiga Samoa ua mae‘a ona resitala.
Ua faagata ile taimi nei le toe resitalaina mai o nisi ae se‘i faasolo muamua le polokalame ina ia vave ona tofusia uma aiga ua lesitala mo togalaau.
Peitai oloo iai le avanoa e auai soo se tagata ile fonotaga ma le aoaoga oloo lumanai nei ale Pacific Gardeners Club e faia ile Te Puke Hall i Otara ile Aso Tofi, 23 Mati mai le 9am – 10am.
