Ole taeao fou o Samoa ua amatalia ina ua aloaia nei ona tauaveina e le afioga ile Tamaaiga Tui Aana Tuimalealiifano Vaaletoa II le tofiga Ao ole Malo o Samoa faatasi ai ma lana masiofo le afioga Faamausili Leinafo Tuimalealiifano.
Ole maota le tumau ole Palemene i Tuanaimato na faatumulia ile Mamalu o malo valaaulia mai tumutumu ole atunuu ma le Malo e oo ile faamasinoga. Na auai foi aiga ma uo ma aumea mamae ale afioga ile Ao ole Malo ma le masiofo ile fia molimauina ole faatautoga na faatinoina e le afioga ile Faamasino sili, Patu Tiavaasue Falefatu Sapolu.
Na faatino faaaloaloga mamalu uma mai lava ile toai taunuu ole Tui Aana ma lana masiofo sa taina le vii ole fua ole saolotoga ole Malo Tutoatasi ona asiasia le ole tulai faaaloalo ale vasega o Malu ole Malo.
Na afifio i totonu ole Palemene ma amatalia loa le sauniga lotu na taitaia e le Taitaifono Aoao ole Ekalesia Faapotopotoga Kerisiano Samoa, le susuga ile Toeaina o Tunumoso Iosia. Ole lauga ale susuga ile Toeaina na momoli ai upu timai ma upu apoapoai e tomatauina ai le amataga ole nofoaiga ale Ao Mamalu ole Malo ua tofia e le Palemene ina ua tuanai le sefulu tausaga na seei ai le afioga ile Tui Atua Tupua Tamasese Efi ma lana masiofo ile tofiga mamalu, maualuga ma le taualoa ole atunuu.
Ole Malelega ale Tui Aana na ia faafetaia ai le Palemene, ma le Malo ile faaeaea ma le faatuatuaga ua filifilia ai o ia ma lana masiofo ile tofiga mamalu ole Malo. O lana malelega lenei:
Malelega Ao ole Malo fou – Tuimalealiifano Vaaletoa Sualauvi II
“Aua nei ia te i matou le Alii e, aua nei ia te i matou, a ia tuuina atu le viiga i lou Suafa, ona o lou Alofa ma lou Faamaoni.”
Lau Susuga ile Taitai ole Sauniga – lau Afioga ile Taitaifono ole Ekalesia Faapotopotoga Kerisiano i Samoa; Lau Susuga ile Toeaina – Tunumoso Iosia, le Aufaigaluega Paia ale Atua, Lau Afioga ile Tuiatua Tupua Tamasese Efi ma lou Masiofo, sa oulua seei mai ile Nofoa ole Ao Mamalu ole Malo Tutoatasi o Samoa, a oulua Afioga i Sui ole Fono a Sui Tofia – Lau Afioga Le Māmea Ropati Mualia ma lau Masiofo, faapea lau Afioga Pule Tuiloma Lameko Gaee; Lau Afioga ile Alii Palemia – lau Susuga Tuilaepa Sailele Malielegaoi, ma outou Afioga i Minisita ole Kapeneta.
Lau Afioga ile Faamasino Sili – lau Afioga Pātū Falefatu Sapolu, ma le Peresetene ole Faamasinoga o Fanua ma Suafa – lau Afioga Fepuleai Atila Ropati; faapea le Mamalu tele ole Faamasinoga. Lau Afioga ile Fofoga Fetalai – lau Afioga Leaupepe Toleafoa Faafisi ma Sui Mamalu uma ole Palemene.
Faauluuluga ma Sui o Malo mai Fafo. Le paia ma le mamalu o Samoa ua potopoto. Auā le Usoga a Pule ma Tumua, Ituau ma Alataua, Āiga ile Tai ma le Vaa o Fonoti. Le Afifio o Āiga ma a latou Tama, o Tama foi ma o latou Āiga. Tainane foi le Tapuaiga ale Kovana Sili ma le Faigāmālo a Tutuila ma Manua. Le Pāia lava lea auā Sua ma le Vaifanua, Fofō ma Aitulagi, Saole ma Saleaumua, Faatui ma Tootoo ole Faleula, ma upu ile Manuatele.
O outou Tuitui fafau ma outou Sā tatapu, o outou Paia faaufigatā ma outou mamalu faausisisili, ole a taoto ia a’o se fuataupea ua iumaea mau. Auā ua uma ona ufipōpō ma tapula i mavaega, ua fata i mauga o lagi ma tagata i faiā, ua fesootai taualuga sā, ae auga i amoleaotala nā tulaga uma, i moegālafo ma taui talatala ale autaoo, ma le autolopopoto ole Faleupolu.
Ua uma ona tatou muai lalagi sugalu ma momoli muamuafataga. Ua tatou faapoipoi ma faaneenee i paia agi-nunui tetele, ma mamalu pāui-sisili ole Atua Silisili Ese. Auā fai mai le molimau faatalapipisu ale Tusi Sā ole Ola, ua uma ona matofa le papa o tōfiga , ma tuu faasagamau e le Atua le Atulaulau, i ona tōfiga māelagi ma ona mamalu faasapitafai. Ua na o ia lava ole Tapaautasi o Samoa, ma le Lalolagi atoa. Ia tumau pea ia te ia le Viiga ma le Faamanu, nei e oo ile faavavau.
Faafetai tele i lau Susuga ile Taitai ole Sauniga. Ua taliga o Fialogo lau faasoa faaleagaga, ua lē gata ina tomatauina ai Taitai o si o tatou atunuu, a ole tapueina foi o lou nei tagata faatauvaa, ile tauaveina o ou tiute ma faiva, e tusa ai ma lenei Tōfiga maualuga ua faaee mai ia te au e le Palemene o Samoa.
Lau Afioga ile Tuiatua Tupua Tamasese Efi, o lē sa tū ile foe i lena sefulu (10) tausaga ua tuanai atu. Ua faamālo le onosai. Ua faamālo le tautua ia Samoa. ole fetalaiga ia Lefaoseu ma Ulumū, “Ua se togi le seu lagatila, ua e faapulou ile tuālima, ua faamālo fai ole faiva.” O lea ua e faaseetuāgalu, a ole tofiga ole Ao Mamalu ole Malo, o loo taoto pea i se tulaga maoae ma le mamalu, mai lava ile Ao Soofaatasi, o lea foi sa e taofiofi mamau iai. Ia faamanuia tele le Atua i lau Afioga ma le Masiofo.
Lau Afioga ile Alii Palemia ma lau Faigāmālo. Lau Afioga ile Fofoga Fetalai ma le Palemene o Samoa. Ua faamālo le tauivi ma le finafinau. Ua faamālo le galulue punouai. Ua faamālo i lo outou alofaiva ma le lē faalogologotīgā, ina ia manuia Samoa ma ona tagata.
Ua faamālo le faatupu. Ua faamālo le faaeaea. Ua faafetai mo lo outou faatuatuaga ua aumai ia te au ma lou toalua, ma te sēei ai i lenei Tofiga tāua tele ole Faigāmālo a si o tatou atunuu. Ia fesoasoani mai le Agaga Paia iā i māua. A ia faamanuia tele le Atua i a outou Afioga!
E lē faaitiitia le agaga faafetai i o māua Mātua Faaleagaga, le Susuga ile Toeaina Faatonu ia Tautiaga Senara ma le Faletua ia Olita, ole Sui Taitaifono ole Ekalesia Aoao EFKS i Samoa ma le Lalolagi, faapea le mamalu tele ole Aufaigaluega Paia ale Atua. Faafetai tele i Afioga ile Nofo a Faaaloaloga o lou Āiga Tauaana, ole Falefitu a Leatiatagaloa ma lo matou Nuu o Falelatai, faapea lo matou Itumālo Faafaipule o Falelatai ma Samatau. Tainane o māua āiga uma i Samoa ma atunuu mamao. Faafetai tele mo la outou tatalo.
Faafetai mo la outou fautuaga ma outou tuualalo. Faafetai tele mo la outou lagolago mai i a i māua i soo se mea. Faafetai tele mo le Aufailotu o loo faanōnōmanū mo le manuia, ma le soifua faale-agaga ole atunuu.
Ia alofagia e le Atua Samoa Aoao. Ia aua nei taia le tuluvao, pe solo peauga, i tupu ma ee o Samoa. I Aiga ma a latou Tama, o Tama foi ma o latou Aiga. Aua nei solo le lavelave o vanua, poo le filifili o maugaoo auā Tumua ma Pule, Ituau ma Alataua, Aiga ile Tai ma le Vaa o Fonoti. Ia aua nei afe se atua ole ala. Ole maatui ma le tagutugutu, o mailei ia ale tiāpolo. Ole vaiatiga ua afetuālāina ai le soifua ma le ola. Ia manuia tele Oe Samoa
Fai mai le faamanatu ale Perofeta o Mika (6:8) “Sole, ua faaali atu e ia ia te oe le mea lelei; se a foi se mea e finagalo ai le Alii (Ieova) ia te oe? Pe ā lē o ia mea, ia fai le amiotonu, ia naunau ile alofa, ma ia feoai ma lou Atua ma le loto faamaualalo”
Soifua:
TUI AANA TUIMALEALIIFANO
VAALETOA SUALAUVI II
Ao ole Malo Tutoatasi o Samoa
