O le vaai mamao a le Iuni lakapi a Samoa ua atinae ai nei le Aoga Lakapi Faapitoa a le SRU (Academy). O lenei aoga o le a aoaoina ai le tomai faalakapi auā le atinaeina o le aufili a le atunuu, le Manu Samoa.
O le a filifilia e le SRU alii ma tamaitai e agavaa i le taalo Lakapi ma o le a ulufale ai i latou i le aoga faapitoa. O lenei faamoemoe sa tatala aloaia e le Afioga i le Taitaifono a le Iuni, le Afioga i le Palemia Tuilaepa Lupesoliai Dr Sailele Malielegaoi.
O le faatonu o le Aoga o le susuga Shalom Senara. O faiaoga faapitoa o le susuga Namulauulu Alama Ieremia le faiaoga a le Manu Samoa lenei aoga faapitoa. E fesoasoani le susuga Damian McGrath le faiaoga a le Taitoafitu a le Manu, ma o le a lagolago i ai Semo Sititi ma Potu Leavasa ia Namulauulu ma McGrath. O faatulagaina lea o le faamoemoe a le Iuni. O le sini lava o le faamoemoe o le toe foi lea o le Manu i se tulaga maualuga i le Lakapi a le Lalolagi. E auala lea i le faaopoopo o le taleni e filifili mai ai le Manu.
O le saunoaga autu o le aso na saunia lea e le afioga Tuigamala Vaaiga Tuigamala. I lana tapenaga na ta‘ua ai e Tuigamala le aogā tele o lenei faamoemoe ma le aoga fou a le SRU.
I le filifilia o le vasega amata, ua filiga ai le toatele oi latou ua iai nei i aufili o le U-20 ma nisi ua aafia i le vaega koleni lautele a le Taitoafitu. O nisi oi latou ua maua a latou avanoa o loo i le faitotoa a le Manu, e lē o toe mamao foi maua ni o latou avanoa i le ‘au tele a le atunuu.
I le saunoaga a Tuigamala na ia lagolagoina ai le auala ua taoto nei mo alii ma tamaitai taaalo. O se avanoa e lei maua e isi tupulaga taaalo muamua. O lana lapataiga, ia sapasapaia lenei avanoa auā le lumanai o aiga aemaise se manuia mo le ‘au a le atunuu.
Na auai i le tatalaga aloaia o le Aoga Faapitoa, tuaa uma o alii ma tamaitai ua filifilia. O se vaaiga matagofie lea auā le lagolagoina o i latou uma ua faamanuiaina i lenei avanoa.
