O vaaiga ile pasi ale Tepatasi na taavalevale ile Aso Toonai na tea nei ma maliliu ai le toatolu ole pasese e aofia ai ma le alii avepasi

O vaaiga ile pasi ale Tepatasi na taavalevale ile Aso Toonai na tea nei ma maliliu ai le toatolu ole pasese e aofia ai ma le alii avepasi

Ua oo mai le taimi e matuā silasila toto’a ai le pulega o feoa’iga i luga ole laueleele poo le Land Transport Authority ile saogalemu o soifua o tagata malaga i luga o pasi la’upasese e fausia i laupapa. Ole molimau lea a nisi ole au matutua sa iai ile taimi na lavea ai le pasi laupapa ole Tepatasi ise vaega ole alatele i Faleula ile aoauli ole Aso Toonai na tea nei.

E lavea ile va o Puipaa ma Faleula ua agai le pasi i Manono mo lana malaga mulimuli ma ole molimauola lea ole numera e 46 ole pasese na malaga ai e pei ona faamaonia mai e leoleo.

O manu’aga na aafia ai le toatele ole pasese e mafua mai i laupapa ma u’amea oloo fausia ai nisi o vaega ole pasi i totonu e aofia ai ma nofoa.

E toatolu tagata na maliliu ai ile taimi lava ole faalavelave, ole avepasi ma se tina matua 67 tausaga ole soifua, faapea se isi tina talavou ua lē māua le matua o lona soifua.

Na faamatala se tasi ole pasese ise tasi o lipoti e faatatau ile faalavelave, e saoasaoa le pasi ae sa ia vaaia le alii avepasi a’o lei tupu le faalavelave o taumafai i sana gaioiga e ta ai se pese mai lana telefoni feavea’i.

Na sosoo le gaioiga lea ma le feto’ai loa ma se isi taavale ma taavalevale ai loa le pasi. E manatua e lea tagata ole pasese e pei ona ia faamatala ile lipoti ale nusipepa ole Sunday Samoa, e faatolu ona taavalevale le pasi ma e fua lea molimau i vaaiga i ata na vaaia i luga o fesootaiga ole facebook ile tu matilatila mai ole pasi ua leai atoa se fale.

Peitai e iai foi nisi mau e faapea e lei saoasaoa tele le pasi ae ose isi taavale sa tu i autafa ole alatele sa solomuli i tua ona toe faatau tu lea a’o alu atu le pasi e lei latalata ile taavale lea.

Na toe solomuli i tua le taavale ose van lanu mumu ma taumafai e mimilo e foliga e fia agai ile itu i Sasa’e poo le sau agai mai i Apia.

O i tonu na faaalia e nisi ole pasese sa mafua ai le faalavelave ina ua taumafai le avepasi e taofi le pasi ae ua lē mafai ua latalata atu ile taavale mumu. Na ta loa i tua i autafa ole alatele ma ole taimi na maua ai e pa’u ole pasi le oneone poo maamaa i autafa ole ta na taavalevale ai loa.

Faaalia ele sooupu ole Matagaluega o Leoleo, e 46 le pasese na malaga ile pasi ma e aofia ma ē ua maliliu. Ole toatele ole pasese na manunu’a.

Ole numera faatapulaa ole pasese e tauave e pasi la’upasese laupapa lapopoa ole 33 o lona uiga na tauave ele pasi se pasese faasili e 13 ma ose solitulafono.

Ua maliu le avepasi e maua tonu ai se faamatalaga ole mafuaaga ole faalavelave ae peitai e toatele le pasese ua fesiligia nei e leoleo faapea nisi sa vaaitino ile faalavelave mo le maua ai oni mau maumaututu e faavae ai se talitonuga poo le ā tonu le pogai ole faalavelave.

Ua lē finagalo le sooupu le afioga Aupaau Logoitino Filipo e aumai nisi faamatalaga auiliili ile mafuaaga ole faalavelave ona oloo faia suesuega a leoleo, peitai mo le silafia ele aufaitau ua tele nisi faalavelave e aafia ai pasi la’upasese sa tutupu ini tausaga e lei mamao tele atu ma aafia ai lava soifua o tagata.

Oloo tuli faasalaga faafalepuipui o nisi alii avepasi na faamaonia ile faamasinoga le avetaavale faatamala ua mafua ai le maliu, a’o nisi avepasi o moliaga ole fasioti tagata pa’ivalea e mafua i faalavelave tau taavale poo le motor manslaughter.

Na faaalia ese tausi soifua ile vaega e taunuu iai gasegase tigaina ma tagata e aafia ini faalavelave faafuasei, e leai se isi ole pasese na manunu’a o taofia i potu mo gasegase tigaina ona o nisi ua toe tea i tua ina ua mae’a togafitiga ae o nisi oloo taofia pea mo togafitiga i manu’aga na aafia ai.

Ole faalavelave tau taavale muamua matuia lea o lenei tausaga fou 2018.

Ia faamaise le agaga faamafanafana ole Atua i aiga ma fanau ona o ē pele ua maliliu ile faalavelave.

Comments

comments