“Faafetai mole tautua ona e lē faigofie, faafetai foi ile tautua atunuu male tautua Malo”
Ole tautua faaleoleo ile Malo male atunuu o Samoa ose galuega e tele faafitauli ma faaletonu e fetaiai pea ma o luitau foi ia mose tasi e fia avea ma leoleo aemaise o lana tautoga ole loto faamaoni.
Ole tele o ia faafitauli ma faaletonu e lē ‘asa se taimi ma aliali mai, ae e lē tuta‘ia ai le galuega male tautua faaleoleo auā oi latou e faamalosia le tulafono ma puipuia le saogalemu ole Malo male atunuu atoa.
Ole aso faapitoa e manatua ai le galuega faaleoleo o lenei tausaga 2016, ua lē gata ina manatua ai i latou ua maliliu ona ole faatinoga o o latou tiute faaleoleo, ae manatua ai foi tagata uma ua maliliu ma oloo soifua pea sa tautua ile galuega.
E faapena foi ona avea ma aso e manatua ai Alii ma Tamaitai oloo tauaveina tiute faaleoleo ile taimi nei auā ua latou faaauau pea le galuega sa faia e i latou ua tuua le Matagaluega.
Ole tautua a nisi o Komesina o leoleo e pei ole afioga Saunoamaalii Sonny Schuster, Asi Tuiataga James Blakelock, ma Lilomaiava Fou Taioalo, na faatāua ile sauniga o lenei tausaga lea sa tauaao iai ni faailoga faapitoa.
E faapena foi i nisi o tamalii sa galulue ae ua maliliu e pei o le susuga Manu Falaula, Gaono Jack Schmidt, ma Jack Chadwick. O alii leoleo e toafā oloo galulue pea ile taimi nei sa latou faasaoina le ola ose tamaitiiti na tafefea i gatai o Mulinuu ise taelega.
E toatolu tagata ole taelega na maliliu ai ae ole totoa o alii leoleo nei na mafai ai ona faasaoina le ola o le tamaitiiti e toatasi. O i latou ia e aofia ai le susuga ile leoleo taailua o Alesana Ieremia, Susuga i alii leoleo o Se‘ese Fidow, Malu Fagalele, ma Iakopo Leifi.
O nisi o leoleo sinia ua lē toe galulue ma ua fai i lagi le folauga sa maua faailoga taualoa e manatua ai lo latou sao ile tautua ale Matagaluega, ole susuga Siligatusa Semi Lesa, Lilomaiava Fou Taioalo, Fetu Taalili, ma Sifuiva Sonny Epati.
Ole taimi muamua lenei ile aso faamanatu o galuega a leoleo ua faaaloalo ai le Matagaluega o leoleo i nisi sa tautua e aofia ai ē sa avea ma Komesina ole matagaluega.
O soloaiga mai o faauluuluga o lenei matagaluega tāua ale Malo ua oo mai i lenei vaitau ua iai ni suiga tetele ua faaofi ma ua lagomia ai lagona o Malu ole Malo. Ose tasi o ia suiga ole lē toe faia lea ose faaaloalo faaleoleo mo ē ua maliliu sa malolo litaea mai le galuega.
Ole faaaloalo lea ole ufiina o lona pusamaliu ile Tagavai poo le Fu‘a ole Malo, male tauaveina o lona pusa maliu e alii leoleo. Ua na‘o leoleo e maliliu ini galuega faaleoleo e faia iai lea faaaloalo.
Faaalia ese tasi o Komesina lagolago ose faaiuga na faia ele Komesina ua iai nei, peitai ua manatu nisi o leoleo sinia ose itu e tatau ona toe faaofi ona ose porotokolo tāua i galuega a leoleo le faia ole faaaloalo ia i latou sa galulue ma ua litaea ona e tele tausaga sa tautua ai.
