Ole alii ma’i lena e lua tausaga le matua ia Joshaia Kolise o Salelologa, a’o galulue le Toomaga e saili sona pasese e ave ai i Niu Sila e togafiti lona fatu

Ole alii ma’i lena e lua tausaga le matua ia Joshaia Kolise o Salelologa, a’o galulue le Toomaga e saili sona pasese e ave ai i Niu Sila e togafiti lona fatu

Ole faaaogā tatau ai ole Facebook, e sefe ai ola o tatou tagata, lea ua toe faamaonia mai foi ele Toomaga mo ē Puapuagatia. Ona ole tali alofa mai a tagata ole tatou atunuu, ae o isi atunuu ole lalolagi, ile aisiga faatopetope ale Toomaga mo ē Puapuagatia i luga ole FB ile po ole Aso Toonai na tea nei.

Ole aisiga ina ia avatu vave ai le pepe lua tausaga ia Joshaia Kolise i Niu Sila ile Aso Gafua, 6 Novema 2017 e togafiti ai lona fatu. Ole Aso Tofi ole vaiaso talu ai, na faatoa logo ane ai ele falema’i mātua o Josahia, e tapena se pasese ma a latou ato auā ole Aso Gafua lea ua maua ai le avanoa e avatu ai le latou atalii, i Niu Sila mo lona taotoga ole fatu.

“Na faigata loa ona toe maua se fesootaiga ma matou aiga i Niu Sila, e fesoasoani mai, ma ua vave lava le taimi, lea na ou sulu mai ai ile Toomaga mo se fesoasoani.”

Na oo atu sui ole Toomaga mo ē Puapuagatia ile falema’i e siaki le faamaoni ole augani ane a Teuila, ole uso ole tina ole pepe. Ole tina ole pepe, e ma’i foi ia, sa vaaia foi ile falema’i i Motootua, na afua ai ona iloa ai ma le ma’i fatu o lana tama.

Ole taimi nei, oloo ola le atalii lenei ile okesene mai le masini. Ae ile talanoa a lona tina, “ua iloa lelei lava e Josahia o lona olataga lea ole okesene, auā e masepu ese loa le faagaau ma le isu, tafiti ma tusitusi ile masini ua fia mānava.”

Ile talanoa ale Peresetene ole Toomaga Siliniu Lina Chang, e alu le po ole Aso Toonai ma le Aso Sa o saofai e faafetai i tagata na tali ane ile aisiga i luga ole FB, ma e oo ane ile taeao ananafi Aso Sa, ua $1,500 le tupe ua maua mai le alofa, ole aisiga. Ole faamoemoe ina ia totogi ai le pasese ole tina ma lana pepe, mo Niu Sila ise taimi ole Aso Gafua 6 Novema 2017.

Na ia talanoa, ole mea tāua lava lea ua maua mai lenei seleni, ae o lea taumafai lava e faaauau pea le aisiga o faia nei i luga ole Facebook ale Samoa Victim Support Group, ma faaauala atu ile Web site ole Give a Little.

Ua tele fanau ma soifua ua fesoaosani iai aisiga faalauaitele nei ale Toomaga mo ē Puapuagatia i luga ole Facebook.

O aogā tatau nei o fesootaiga televave, oloo pese mai ai le taitai ole malo, le alii Palemia, susuga Tuilaepa Sailele Malielegaoi, ua agavaa ai ona toe tuu i totonu ole tusi tulafono, le tulafono e faatonutonu ai faasalalauga, mo le puipuia ole siosiomaga faalelotoifale o tagata taitoatasi.

Ua afua lea finagalo faalauaitele ole alii Palemia ona ole anoanoai naua o tala faalumaluma ma le faamalepe filemu, oloo agiga ai nei i luga ole blog, “Ole Palemia” faasaga ile faigamalo ale HRPP ma le taitaiga ale alii Palemia. Ole tala sili ona mataina ma faitau iai le toatele, i lena Blog “Ole Palemia” ole auauai maiga o vaega e lima ole tagatavaleina ole faipule o Salega, sa Minisita o Galuega, Afioga a Luagalau Levaula Kamu.

Ole faatauma’oi ai o fesootaiga televave, pei ona molimauina i lenei vaitaimi, ua le ogatusa ai lea ma le faamoemoe ole malo, ina ia faaleleia atili ma televave fesootaiga, ae ole tatala atu ile lalolagi i fafo, ole avanoa e fesootai mai ai ia Samoa.

E le gata o tulaga tau aoaoga, ae ole faalauiloaina o Samoa, e tosina mai ai tagata asiasi, ma le aufaipisinisi, ia saga faatupulaia ai le tamaoaiga ole atunuu.

Ae ole sailigatupe o faia ai ele Toomaga mo ē Puapuagatia i luga ole facebook mose pasese e avatu ai Baby Josahia Kolise, i Niu Sila mo togafitiga o lona fatu, o atagia nisi ia o aogā o fesootaiga televave o finau ai nei le malo.

Comments

comments