Ole musika ose taleni ma se tomai e tāua tele auā e momoli mai ai se feau ise autu oloo taulai iai se faamoemoe. Oloo i Samoa i lenei vaiaso se aupepese ma se aupopoto ile tomai ole musika mai Amerika ua aofia ai ma ni tamafanau a Samoa ma Amerika Samoa.
Na taunuu i Samoa ile faaiuga ole vaiaso ua mavae atu nei e sauniuni ai mo le latou koneseti e leai se totogi ole ulufale ole a fai i luma ole maota ole Malo ile Eleelefou ile po ole Aso Lulu ole vaiaso nei.
Ile feiloaiga ile faletalimalo ole Taumeasina Island Resort ma tusitala o televise, nusipepa ma leitio na faailoa ai e se tasi ole aumalaga, ua tele lo latou fiafia e malaga mai i Samoa ona ole aave atu o tala matagofie e uiga ia Samoa aemaise o tala ile laufofoga fiafia o tagata, ole faaaloalo ma le tausaafia.
Ole pulega o tagata tafafao i Samoa oloo ‘aifilofilo i tapenaga ole afea o Samoa ele aufaafiafia o musika ma na faaalia e se ofisa sinia ole pulega o tagata tafafao le susuga Su’a Hesed Ieremia, ole faamoemoe ole aufaipese ia maua se avanoa faaauro e faaaogā ai le latou taleni e maua ai e nisi tagata ole atunuu ni mafaufauga lelei e taulai ai ise isi laasaga fou ole olaga.
Ole molimau foi lea ale toatele ole aumalaga o tagata musika uma e toasefulu. Ua vaavaalua lenei faamoemoe ma le aumaia ai ele aupepese oni meaalofa o tusi ma isi mea faitino e faaaogā ile a’oa’oina o fanau a Samoa mo afioaga e sefulu i Upolu ma Savaii. E lei faailoaina mai nuu ma afioaga o Samoa ole a tuusa’o iai le foai.
Ole tasi o faamoemoe ole aumalaga ole feiloai lea ile pulega ole faalapotopotoga ole Toomaga mo ē Puapuagatia ma ave foi iai se latou meaalofa o tusi e a’oa’o ai fanau ua sauaina oloo vaaia e lea faalapotopotoga. Ole Aso Toonai na tea nei na faia ai lea foai ma talimalo ai le Toomaga ile aumalaga.
Fai mai se tasi ole aupepese e lē tatau ona misia e tagata e fiafia i pese reggae ma pese faa-Pasefika le latou koneseti auā ole a faamalieina ia latou tapenaga. Ole vaiaso a sau ua faamoemoe e toe taliu ai le faigamalaga, o nisi e alala ile setete o Hawaii ae ole toatele ole aufaipese e alala i Amerika.
