O le faaaliga lea a le Matagaluega o Fuainumera Faamauina i le fonotaga sa faagasolo i le vaiaso na tea nei e faatatau i galuega ua faagasolo i le feagaiga ua unaia ai le puipuia o aiā tatau o fanau.
O le fono lenei na tuufaatasia ai le Matagaluega o Mataupu tau Tina ma Tamaitai, Atina’e o Nuu ma Aga Fesootai ma ana paaga o loo galulue faatasi i le atinae o fanau, atoa ai le unaiga o lo latou saogalemu.
O le faamaumauga ua faalauiloa ai o le ‘afa o le fanau mai i le tasi le tausaga seia oo i le 18 tausaga ua fesootai ma se ituaiga sauaga, poo sauaga o le mafaufau, sauaga o le tino ma sauaga matagā ae o loo sauaina lava.
Ta‘ua e le afioga Aliimuamua Malaefono Malaga o se suesuega a le ofisa o fuaninumera lata mai lea e sau ai le suesuega lea, ma ua avatu lenei faamaumauga i le matagaluega aemaise o isi paaga tuma‘oti ina ia vaavaai ma faagasolo ai a latou polokalame faalauiloa ma fesoasoani.
O le tausaga e 1990 na saini ai Samoa e lagolago le maliega lenei o le unaia o aiā tatau a le fanau ae o lea lava o loo faagasolo galuega e faamalosia ai e pei ona iai suiga poo teuteuga o tulafono ina ia maioio lelei lenei feagaiga ma ona tuutuuga.
Ua tele foi suiga e pei o le faamalosia o le aooga o fanau mai i le lima tausaga le matutua. Ua faatuina le faamasinoga ua patino lava i mataupu faaleaiga, ma o le faamasinoga lea ua vaavaai ai i nisi o faafitauli o loo feagai ma aiga aemaise le aafiaga o fanau auā o le tulaga sa iai, soo se solitulafono lava o loo aofia ai ma fanau, ua faapea ona tuufaatasi i le Tulafono o Soligatulafono.
O le faafitauli tele lea sa nunumi uma ai lava le tele o tagi sa faia i sauaga na feagai ma fanau peitai o le faamasinoga fou lenei ua agai lava i ai aiga aemaise o le fanau mo lo latou puipuiga.
O le fonotaga la lea na faatautaia i le vaiaso na tea nei na toe aoina uma mai ai faamaumauga mai i paaga a le Ofisa o Tina ma Tamaitai, ma ua toe vaavaai ai i nisi o auala e mafai ona faatino ai galuega ina ia atoatoa tulafono mo le puipuiga o nei aiā tatau mo le fanau.
