O lupe sa vao eseese a ua fuifui faatasi ona o le sasala ma le puaina e tatai mai i se manogi o se fuarosa matala. E pupula pea le lamepa, ua o se vai manino foi e lē o gaepuina e ni toloa o se vaivai, e tuputupu pea, e lē galo i loto ma agaga.
O saaafiafiga ia e lē mavae ma mitamitaga i loto ma agaga o alo ma fanau faapea aiga o le Tina matua, le faletua manumalo ia Siniu Tupu Tuiā.
E tele tausaga sa gapatia ai i le galuega a le Atua, tele foi fatu na totō, o le ala lea o le fuai fai mai o alo ma fanau faapea aiga, uo ma ē masani e faamanatu ma sii a‘e ai le mua, le viiga ma le faamanū i le Tolutasi Paia i lana pule faasoifua i nei tausaga e tele.
O le aoauli o le Aso Toonai, 13 Setema 2014, na faamanatuina ai le 80 tausaga o le Faletua manumalo malolo ia Siniu Tupu Tuiā o Fagalii i le Vaimauga. O ia o le faletua o le susuga ia Rev Tupu Tuiā (Vaiee Safata & Tiavea Aleipata) o le toa o le talalelei ua faiilagi le folauga
O nisi o alalafaga sa galulue ai, o Salepoua‘e i Saleimoa, Samusu Aleipata, Salelesi Anoamaa, Mt Roskill Aukilani NZ ma Inala Brisbane. O le afioga i le Sea a le Ekalesia Metotisi Faasinoti, Rev Halefoti Seloti sa feagai ma se upu faamanuia auā le soifua o le Tinā.
O le alo lava o le tina matua sa fai ma Fofoga o le aso, le tofa ia Maulupe Manase Tupu Tuiā ae fai ma sui o le auvalaaulia le tofa ia Loli Levu, sa ia momoli se agaga faafetai ona o le matagofie ma lava tapena o le aso, lea sa faia i le Tiafau hall a le ekalesia EFKS Southwest, susuga i le Toeaina ia Rev Tauaaga & faletua ia Senerita Mataafa.
Sa auai uma lava tausi matagaluega o le faasinoti ma o latou faletua aemaise uo ma aiga faapea ekalesia a le Faasinoti Metotisi. Toatele alo ma fanau sa malaga mai e aofia ai Melepone, Sini, Niu Sila ma Samoa.
Na malaga mai foi le susuga ia Pr Togamau & faletua ia Ianeta Tupu Tuiā mai Kalaisetete, o se tasi o alo o Siniu o loo tausi matagaluega i le Ekalesia SISDAC, ae faapea le afioga ia Fuaialii Dr Tagataese Tupu Tuiā mai Samoa, o ia o se faiaoga sinia i le Iunivesite a le NUS.
E to‘a 7 alo o le faletua manumalo ia Siniu, 34 grandchildren ae 37 great grandchildren. O se mitamitaga i alo ma fanau ma le alaga fiafia i le Atua ona o loo maua pea le soifua laulelei o si o latou tina. E 80 ona tausaga, ae pei lava faatoa 70, ona o le loomatua e pei e fai sona pito Saina aemaise le fiafia i tausiga a alo ma fanau.
