Ua faafofoga le atunuu, aemaise i faauluuluga o taaloga taitasi, i le saunoaga manino a le Taitai o le atunuu, o le Taitaifono foi o le Komiti o faafoeina nei Taaloga a Malo o le Taupulega, ua fuafua e faia mai i lo tatou atunuu i le masina o Setema i le tausaga nei 2015.
Ua faaalia e le afioga i le Palemia, e tusa ma le 20 miliona le tau o nei taaloga, e lē aofia ai le tau e toe faaleleia ai fale taalo o le Apia Paka, o le fale aau ma isi taaloga e mautinoa e faatino ai, faapea ai ma ni faiaoga o nisi taaloga o loo faatupe uma e le Malo Saina.
O le taimi muamua lenei o le a talimalo ai se atunuu laitiiti talu mai le faatinoina o nei taaloga faavaomalo i Sikotilani i le tausaga 2000.
O le avanoa foi lea na faalauiloa ai ma le talosaga a le Taitai o le atunuu, le afioga i le Palemia, Susuga Tuilaepa Lupesoliai Sailele Malielegaoi, i le mamalu lautele o le aufaipisinisi i totonu o le atunuu, ina ia tuu mai la latou lagolago tau seleni e fesoasoani ai i le Malo, auā le faatupeina o le tele o vaega o le a faatino ai lenei galuega.
O nei avanoa, o le a faalauiloa atu ai a outou pisinisi i le lalolagi o le a mafai ona auai mai e tauva i taaloga o le a faatino ai, o se avanoa lē aumaua e soo se pisinisi i totonu o si o tatou tamai atunuu.
O nisi o vaega tetele sa faaalia e lana afioga, o femalagaaiga, o taumafa, ma le totogi o faletalimalo o le a faapea ona aumau ai le tele o atunuu o le a auai mai i nei taaloga.
O le tausaga 2007, ina ua faatoa mae‘a le Taaloga a le Pasefika i Saute e pei ona sa talimalo ai lo tatou atunuu, sa tuuina atu ai i le faalapotopotoga o Taaloga a le Taupulega le talosaga a Samoa, ma sa ui atu i le Ofisa o le Faalapotopotoga o Taaloga a le lalolagi i Samoa le SASNOC, ma sa faapea ona talia i le tausaga 2008.
O se taimi muamua lenei o le a talimalo ai se atunuu laititi tau atiae ma se atumotu mai le Pasefika i nei taaaloga.
E 53 malo o le Taupulega o le a auai i nei taaloga, faatasi ai ma le 18 Teritori o nisi malo o le Taupulega ona maua ai lea o le 71 atunuu o le a tausinio i nei taaloga.
O nei autaaalo, e aofia ai atunuu eseese o Malo o le Taupulega, ma o le a avea i latou ma a tatou malo faaaloalogia a o faagasolo taaloga.
Ua faapea foi la ona faaoo atu i le mamalu lautele o le atunuu, i la tatou fatu aiga tausi, o le tapenapena lea o le faamamā o afioaga i tafāmaota ma tuāmaota, auā lava talaave atu o le matagofie o si o tatou atunuu, e pei ona laumanuia ai nei i Taaloga a le Pasefika i le 2007, ma le fono a Malo o Taupulega le SIDS, na matuā maofa ai le toatele o tagata faatoa tuvae mai i le matagofie o Samoa, aemaise le filemu e aunoa ni faalavelave e aliali mai ai.
