O le tele o sailiga seleni o loo agai mai i Samoa o loo tali lava e mafutaga a aiga ma afioaga o loo i totonu o lenei atunuu, ae o nisi o sāvali o loo malaga mai o loo galulue faatasi ai susuga i faafeagaiga ma aulotu e tali valaau e pei ona faatalauula mai ai sailiga seleni.
O le EFKS mai Tanugamanono na latou tapa se fesoasoani a le Pulega a le EFKS i Manukau i le toeaina ia Rev Tanielu ma le nofo a faafeagaiga mo se sailiga seleni auā le faamae‘aina o le maota o le faafeagaiga i Samoa, ma sa talia ma le agaga faafetai le talosaga.
Ma o lea sa malaga mai ai tina e to‘a 10 mai Samoa o sui o le EFKS a Tanugamanono se‘i faataunuu le faamoemoe. O le Aso Toonai ua mavae 19 o Setema na galulue faatasi ai loa aulotu e 7 o le Pulega a Manukau e faatino le tusigaigoa i le hall a le Ekalesia EFKS i Otara i le nofoaga o le toeaina o le Pulega ia Rev Tanielu Mamea.
Na tumutumu lea aso i aulotu ma tauaiga o le afioaga faapea uo ma ē masani sa lagolagoina le faamoemoe. Sa faasolo i ipu a aulotu taitasi faatasi ai ma ipu a tauaiga o le afioaga o loo alala ma lolotu i totonu o Ekalesia.
O le susuga ia Fata Faavaoga sa fai ma fofoga o le aso a o le tofa ia Mulitalo sa tutootoo i faaaloaloga. O taumafataga na saunia lava e aulotu e fitu o le Pulega a Manukau. O le loto fiafia e foai ma le silasila i le Atua ma lana galuega na taulimaina ai e le Pulega ma le aumalaga mai Samoa le tino i tupe e $67,000.00.
