I totonu ole 200 tamaiti faauu ole Best Youth Academy ile afiafi ole Aso Faraile ua mavae 24 o Fepuari, na laualuga ma numera tasi ai le toatele o tamaiti Samoa sa faauuina ai Iimataupu taitasi ile Level 2 ma le Level 3, ona sosoo ai lea ma tamaiti Tonga ma faasolosolo ifo ai Iilalo i isi tamaiti o isi atunuu.
Ile maitau iai ile faatāuaina e fanau o nei avanoa ile tausaga 16 agai atu i luga ile tausaga 19, ole 60 pasene o nei tamaiti uma o fanau Samoa o lea ua mafai ona latou ausia se isi laasaga fou o a latou mataupu e ono sailia ai ni galuega aua le lumanai manuia mo latou taitoatasi aemaise ai o aiga. Ma ose fiafiaga sili lea ona mitamita ai matua ona oloo vaaia le tali lelei mai o fanau ile latou tautiga ma le naunau e unai a latou aoga ina ia aua ne‘i ola falolo ile lumanai.
Ose vaaiga lea na iai lea afiafi ile hall i Eden Park i foliga vaaia o mātua ile faatumulia ile fiafia ina ua tali fanau ile tapuaiga sa tu‘i ai le mulipapaga a‘o latou sailimalo auā se ‘ai mo mātua ma aiga.
Ole tama poto e fiafia ai le tamā ae ole tama valea e faanoanoa ai le tina, ae o foliga o lea aso na iloa uma le foliga fiafia oēle tama ma le tina i galuega lelei ale fanau.
Ole fua sa e lulu ile tausaga a‘o lea ua e seleseleina.
Na tatala le polokalame ile sauniga lotu na taitaia e Rev Alesana McCarthy ona saunoa lea ole fofoga ole aso ia Brian Sagala e faafeiloai ma faatulima ile paia ma le mamalu ole auvalaaulia, ma faasolo ane ai ile tufatufaina o tusipasi ale fanau.
Ile Level 2 e 6 mataupu sa aoaoina ele fanau mai le tausaga 16 ma le 17 tausaga
CERTIFICATE IN BUSINESS, ENTERPRISE
& TECHNOLOGY – E 48 fanau sa faauuina ai ma ole ‘afa o nei tamaiti faauu e numera tasi ai foi fanau Samoa.
CERTIFICATE IN RETAILS & COMPUTING LEVEL 2 – E 13 fanau na faauu ai.
CERTIFICATE IN HEALTH, RECREATION & SPORT LEVEL 2 – E 9 fanau na faauu ai.
CERTIFICATE IN PERFORMANCE
& PERFORMING ARTS TECHNOLOGY LEVEL
2 – E 5 fanau na faauu ai.
CERTIFICATE IN TOURISM & SERVICES LEVEL 2 – E 5 fanau na faauu ai.
CERTIFICATE IN INTRODUCTORY SKILLS FOR TOURISM LEVEL 2 – E 4 fanau na faauu ai.
Ile Level 3 e 5 mataupu sa aoaoina ai le fanau
CERTIFICATE IN CAREER PREPARATION FOR TRAVEL&TOURISM LEVEL 3 – E 20 fanau na faauu ai.
CERTIFICATE IN TOURISM LEVEL 3 – E 19 fanau na faauu ai.
CERTIFICATE IN TRAVEL TOURISM & TECHNOLOGY LEVEL 3 – E 5 fanau na faauu ai.
CERTIFICATE IN FREIGHT ADMINISTRATION LEVEL 3 – E 14 fanau na faauu ai.
CERTIFICATE IN BUSINESS, ENTERPRISE AND TECHONOLOGY LEVEL 3 – E 46 fanau na faauu ai.
Ile Level 2 oloo iai fanau 16 ma le 17 tausaga le matutua oloo maua a latou avanoa e toe nonofo ai e faaauauina nisi o mataupu ile tausaga fou auā e ta‘i 2 tausaga lea oloo mafai ona tauaveina ai le mataupu, ae o tamaiti aoga ile tausaga 18 ma le 19 e iai nisi o fanau ua mafai ona agai atu ile Iunivesite a Aukilani, AUT o nisi ua mafai ona ulufale atu ile MIT ae o nisi o fanau ua mae‘a lava a latou vasega ma agai sa‘o atu loa i galuega lea na sailia ele aoga lenei ole Best Youth Academy, auā ole tasi lea tāua ole aoga e mafai ai ona sailia lava e latou le galuega e talafeagai lelei ma le mataupu sa aoaoina.
Ole CERTIFICATE IN EMPLOYMENT SKILLS LEVEL 1, e toafitu fanau sa faauu ai, ose mataupu ua faailoa e nei fanau lona tāua ia i latou, ua mafai ona aoaoina ai le tomai ma le iloa ile sailia ai o galuega ma e malamalama ai ile faiga ole CV, le faaaogaina ole computer, auā o nei aso ua lē o toe faaaogāina ni peni ma ni api ae o computer ua tele ina faaaogā.
Ole faamoemoe maualuga o lenei polokalame i totonu ole Best Youth Academy ia faailoa atu ai ia Samoa ma mātua ia mafai ona ausia e fanau ma mātua le manaoga oloo i fanau ia maua ni galuega, ae lē gata i lea ia faatumauina ma faamalosia i loto o fanau le olaga aoga ole tamaititi ia faailoa mai lona poto ma lona agavaa oloo natia i totonu ona ole leai ose ola suesue ma sogasogā.
Ia iai foi le naunautaiga o fanau ia sili atu le mea na te maua ina ua maua le tusipasi nai lo mea sa iai le lagona o mātua latou te maua. O lona uiga e sili atu le isi tupe maua ile totogi pe‘a lelei le mafaufau ma maua le tusipasi nai lo le galue ae leai se tusipasi.
Ole tapenaina ole tamaititi aoga e tatau ona maua le tusipasi, ia tatau ona iloa ola e fai lona aiga ile lumanai, auā e lē gata ile maua ole poto lautele ma le poto salalau ae ia tausisi foi i tu ma aga a Samoa ile faaaloalo i soo se tagata.
Ole luitau ma le faamalosi ale susuga ia Fata Ueligitone Malifa, ose tamalii oloo tautua foi i totonu o lenei aoga, ia tatau i mātua ona unaia fanau nei e faatāua le avanoa oloo aooga fua ai i nei mataupu, auā a faatupe lenei polokalame e ono oo atu i luga ile $10,000.00 le tupe e totogi, ae o lea ua maua le avanoa e faatupeina ai ele malo lenei polokalame mo fanau nei ile 16 agai ile 19 tausaga.
Afai foi ua iai fanau ua iu mai i aoga maualuluga ma nisi o Kolisi ae ua leai ni aoga e toe o iai, e tatau i mātua ona faatāua le avanoa lea ua maua mai mo fanau auā se manuia o fanau ma aiga ile lumanai.
