Ole ogatotonu ole tausaga ua mavae 2015 na amata ai ona galulue le konekarate faufale mai Saina e fausia le galuega tele o maota mo le malae vaalele faavaomalo i Faleolo. Ole galuega ua faatupe ele Malo o Saina faatasi ai ma le lagolago ale Malo o Samoa.
Ole Malo o Iapani na fausiaina fale ole malaevaalele ise fesoasoani a lea paaga tāua a Samoa, peitai o fuafuaga alualu mamao ale Malo ile lima tausaga ua mavae na saili fesoasoani ai ile Malo o Saina mo se nonogatupe e māmā le tului mo le fausia loa o nisi fale e tetele atu ma fausia ai auala e taunuu iai vaalele ma agai ane ai pasese ile vaega e siaki ai pepa malaga ma uta faapea foi i pasese e tuua Samoa.
O lea la ua mae‘a le vaega muamua poo le phase one ole galuega e pei ona iai le maota matagofie (silasila ile ata) e tatala ile Aso Lulu o lenei vaiaso le faaiuga ole masina o Novema 2016.
Ose maota e ese foi lona fausaga ua fausia ai e tusa ole ata ma ua suia ai vaaiga ole malaevaalele faavaomalo i Faleolo. E lē ‘asa se galuega ma lagona faaalia o tagata auā e lē o tagata uma e lagolago ma tetee ini fuafuaga ale Malo.
Peitai e lilifa lagona faaalia o tagata na fesiligia ile faafetai ile Malo ona ole fausia o nisi maota sili atu ona lelei mo pasese e tuua le atunuu ma pasese e afea Samoa. Ole suiga fou e lē gata o fale ae o totonu ile vaega e faatino ai tapenaga uma mo faigamalaga a vaalele.
Ole vaega muamua ua tatala ole a lē faaaogāina ai auala e pipii iai vaalele ona ua faailoa ele Palemia ua na‘o le vaega lava e taunuu iai pasese ma pasese e malaga ese ma le atunuu ae ole vaega lua ma le vaega tolu ole galuega ole a faatino ai lea tulaga.
E amata atu la ile masina fou o Tesema ole a lē toe faaaogāina le vaega o fale oloo iai nei ae ole a siitia mai ile vaega muamua ua tatala ma ole a silasila iai lo tatou atunuu ole a malaga tafafao mai i malologa ole faaiuga ma le amataga ole tausaga fou ile galuega ua mae‘a.
Ole tulaga mautinoa ole tala ave lea ole a foi ma o tatou tagata ole matagofie o fale ole malaevaalele. Ole vaega oloo faaaogāina ile taimi nei ole a tala i lalo ae faatino ai loa le vaega lua ma le tolu ole galuega.
Ua faaalia ese ofisa sinia ole pulega o malaevaalele, ole masina o Setema ole tausaga fou e tatau ona mae‘a ai vaega oloo totoe ona tino mai lea ose vaaiga matagofie ma maoae ile malaevaalele faavaomalo i Faleolo.
Oloo taumafai le Malo ile taimi nei e faia ni malaga a vaalele mai Saina e afea ai Samoa ma ua fetaui lelei le fuafuaga ma le galuega ua iai nei.
