Ua faamautu e le Taitaifono o le Iuni Lakapi a Samoa, le Afioga i le Palemia, Susuga Tuilaepa Lupesoliai Sailele Malielegaoi e tusa ma le tasi ma le ‘afa miliona ($1.5 miliona) tala Samoa le gau a le Iuni Lakapi a le atunuu i le taligamalo lea ua faatoa mae‘a atu i le ‘au a le All Blacks i le la taaloga faitaulia ma le Manu Samoa.
O se tulaga sa iai lava le matematega i le amataga o lenei taumafaiga e oo i ai ona o Samoa na faamalaga‘i i lenei asiasi mai a le au numera tasi a le lalolagi ma o Samoa lava foi e talimalo, o lona uiga e faatupea le tele o lenei taaloga faitaulia i le talafaasolopito o le atunuu.
O le faamatalaga a le alii Palemia ina ua fesiligia, o le tau atoa lenei na alu i pasese o tama taaalo ma le pulega, o le nonofo ai i Samoa nei, o alauni o tama atoa ai ma le tausiga a o iai i Samoa, o vaega uma ia o le maliega i le aumai ai o le All Blacks.
Ua tele foi faitioga ua agiga e faatatau i le gau ua iai nei ae e pei lava ona ta‘ua e le taitaifono o le Iuni lakapi a le atunuu, o le gau lava na faapea ona vaavaai i ai i le amataga o feutagaiga e aumai le ‘au tele lenei i le atunuu.
Faaalia e le alii Palemia, o le All Blacks lea na taaalo ma le Manu Samoa ma o ituaiga tau lava ia e vaavaai i ai ma o le tau atoa o le malaga lenei ma polokalame o le taaloga atoa e oo atu i le $3.4 miliona tala, ma o le tupe la lea na maua e totogi ai ua totoe ai nei le $1.5 miliona tala, ma na ta‘ua e le alii Palemia e ono agai foi i ofisa o le malo ma kamupani tuma‘oti i le atunuu auā le sailia o se tupe e totogi ai le gau a le Iuni i le taimi lenei.
E ui i lenei tulaga ae o le tatala o le avanoa e mafai ona asiasi mai ai le All Blacks i se isi taimi i le lumanai aemaise foi le tatala atu ai i isi foi ‘au a le Pasefika o lenei lava avanoa e talitonu le Taitaifono, o le aoga tele lea o lenei taumafaiga ma le atinae o le lakapi lava ia i Samoa.
O se taaloga foi na molimauina ai le tele o pisinisi tuma‘oti na maua ai faamanuiaga aemaise i le faatauina o oloa o lenei taaloga, ma o le manuia lena e lē o aofia i le tau atoa na ave i le Iuni Lakapi a le Atunuu na te faatautaia.
