Maua mai lipoti i upega o fesootaiga, ua amata ona taufetuli solo le pulega a le kalapu a Iapani lea ua saini aao ai nei le alii ta‘uta‘ua o Sonny Bill Williams, e saili faatapito se fale matagofie e tusa ai o le manaoga o le alii taalo.
Na ta‘ua e le pule o le kalapu lakapi a le Panasonic Wild Knights, lea o le a taalo ai Sonny Bill, le alii o Seigo Ikeda, o le manaoga o le alii taalo, ia maua sona fale e tolu ni potumoe, ia telē se potu malolo ma ia lava le telē o le avanoa o le fale auā le talimalo ai foi pe a oo ina asiasi atu lana uo tamaitai, lea ua la toe faatasia foi i lenei vaitaimi, le tamaitai o Aleisha Berryman.
E pei ona silafia, o le tamaitai lea o Aleisha sa muamua lava faalauiloa ai foi ata ma faamatalaga a le au faasalalau e faapea o le uo tamaitai a Sonny Bill.
Mulimuli ane na toe aliae tala ma ata o se isi foi tamaitai talavou e lauiloa tele lona aiga i Niu Sila nei. Ae o lea la ua toe maua mai tala mulimuli nei, e foliga mai ua toe faatasia foi Sonny Bill ma le tamaitai o Aleisha.
Ta‘ua e Seigo Ikeda, ua nofo tatali uma latou ma fiafia, atonu o le a avea le auai atu o Sonny Bill e taalo lakapi i Iapani, ma itu o le a matuā iloga ai se suiga tele i le tulai mai o le lakapi i totonu o Iapani.
Atonu o le a amata ai ona toatele tagata e fiafia i le lakapi, ma amata ai ona iai ni a latou moemitiga e fiafia e taaalo lakapi ma ta‘uta‘ua e pei o Sonny Bill.
Ta‘ua mai nei, ua talia e Sonny Bill le ofa e $1 miliona lea o le a taalo ai mo le kalapu a le Panasonic Wild Knights i Iapani, mo ana taaloga e 12 e amata mai ia Aukuso e oo atu i le masina o Ianuari o le tausaga fou, 2013.
Atonu o le a nofo SBW i se fale e latalata lava i le nofoaga o le kalapu a le Wild Knights i Ota-shi, o se aai fou e i le 80kilomita i matu i sisifo o Tokyo.
E manatu Ikeda, pau le luitau tele o le a fesagai ma Sonny Bill, o le gagana a Iapani. Lona uiga o le a tatau ona aoaoina muamua lana gagana Iapani.
Ae foliga mai se manatu o le alii taalo, e fiafia e fai lena laasaga, e fia aoao lana gagana Iapani, ma e manao foi ia vave ona faamasani i tu ma aganuu a lea atunuu, aemaise ia vave ona masani atu i lana kalapu o le a latou galulue faatasi.
Faaalia e Ikeda, o le a faigata le sailia o se fale e tau ai le finagalo o le alii taalo, ona e fai sina laiti o fausaga o fale a Iapani, laiti ma vaiti potu, pe a faatusatusa i potu lapopa o fale i Niu Sila, lea ua masani ai Sonny.
Lipotia mai foi le fiafia o Sonny auā o se tasi o mataiai o le alii lakapi o le sushi, ae o le mataiai sili lea a Iapani, ma ua amata nei ona siaki uma e Sonny fale‘aiga mananaia uma o Iapani ina ia mautinoa e oo uma i ai i le taimi o le a aumau ai i Iapani.
