“O loo silafia e Lealailepule faiga lē sa‘o i tagata lesitala”… Ale Vena
O le tusi a le tofa i le Igoa-matua o Ale Vena i le Komesina o Faigapalota, le afioga Tanuvasa Isitolo Lemisio na ia talosagaina ai se gaioiga e taofia ni faiga ua ia faamatalaina o ni faiga lē sa‘o ma lē amiotonu.
“O le agaga lena o la‘u tusi na ave i le Komesina o faigapalota ona ua toatele tagata ese ua lesitala i le lola a o matou itumalo faafaipule”.
Na faaalia e Ale o lana tusi na ave le kopi i le alii Palemia, susuga Tuilaepa L. Sailele Malielegaoi.
“E toatele tagata mai isi nuu e pei o Satapuala ua la‘u mai ma lesitala i le matou lola, o lona uiga o le a fai e tagata ese le faaiuga ma filifili e latou le tofi o lenei itumalo”, o se finagalo o le tofa i le Igoa-matua.
O se tasi o vaega na ia taua o le avatu e sui o le komiti a le tasi o sui tauva o le latou palota laititi o loo tapena i ai, le pepa ua scan i ai le saini a le Pulenuu faatasi ai ma le lisi o tagata e fia lesitala, ma ua ia faaalia e le o se faiga amiotonu lea.
“E tatau ona alu atu le Pulenuu e saini ma faamaonia i luma o le ofisa o le komesina o faigapalota, o tagata moni nei o loo nonofo i le itumalo ma e iai o latou sootaga faaleaiga”.
O popolega ia o Ale Vena na ia faaalia foi i lana tusi ma ua faatino ai loa se gaioiga a le ofisa o le Komesina o faigapalota.
Ua iai nei le pulenuu o pitonuu ma afioaga taitasi o le itumalo i le ofisa o le Komesina o faigapalota, e saini ai le pepa ma ia faamaonia o tagata moni o le itumalo.
O le palota tele a le atunuu i le tausaga e 2006 na aliali ai foi gaioiga faapea sa gugulu ma oso ai le lē fiafia o nisi o sui tauva o lea palota sa sailia ai tofi o Itumalo i le Palemene. O lea ua toe aliali mai ma ua faaalia e Ale, e le tatau ona toe tupu.
O se tasi o faamasinoga o tagi o palota i le tuanai o lea faigapalota tele, na aliali ai i luma o le faamasinoga nisi o tuuaiga e faapea, o le lesitala o tagata o isi nuu i le lola palota a Faasaleleaga numera 2.
Na faamaonia ia tuuaiga ma soloia ai le filifilia o le afioga Pa‘u Sefo ma toe faia ai le palota laititi a lea itumalo.
O tuuaiga ua faia e Ale Vena faasaga i le tofa Lealailepule Rimoni i le lesitalaina o tagata, o loo teena malosi e lea sui tauva. Faaalia e Lealailepule o loo iai pulenuu o pitonuu ma afioaga o le itumalo i le ofisa o palota e faamaonia tagata taitasi, ma e leai ni faiga piopio o ia faia faatasi ai ma ana komiti. Peitai ua tuuaia e Lealailepule le faaiuga ua faia e le afioaga o Toamua ua tapu ai tagata palota ona palota ese ae na o le tofa i le Igoa-matua o Ale Vena e palota uma i ai.
“E matua faanoanoa lava i le faaiuga lea ona ua afaina ai aia tatau o tagata e filifili saoloto ai e faatino le latou filifiliga i le sui e lagolago i ai”, o le finagalo lea o Lealailepule Rimoni.
Ua faamaonia e le tasi o Igoa-matua, Ulu Vaomalo Ulu Kini lea tapu, ae na ia saunoa e le o taofia ai tagata e faia le latou lava filifiliga saoloto. E leai foi se faaiuga ua faia i se faasalaga i se tagata e le usitaia le tapu.
