Vevela finauga a leoleo ma le loia a Tiavaasu‘e

O le moliaga o le lē laiseneina poo le lē lesitalaina o le taavale ae sa fealuai ai lava le susuga Sauafea Siaosi Tiavaasu‘e o se tamā o Matautu Falealili, ua lē mafai ona faaauauina ona suesue molimau a leoleo, i luma o le faamasinoga fesoasoani poo le FF, ae ua ave nei i le faamasinoga faaitumalo.

Na amata ona suesue molimau o ni alii leoleo i le Aso Faraile na tea nei, ae tulai mai loa se finauga i le va o leoleo ma le loia o loo tauaveina le itu a Sauafea le afioga Leulua‘ialii Olinda Woodroffe e mafua i vaega o le tulafono e faasino i le moliaga.

Na faalava ane le faamasino ma faamanatu i le loia e na o le moliaga lava o le lē laiseneina o le taavale o loo fia maua i ai se silafia o le faamasinoga pe faamaonia pe leai mau a leoleo. Peitai sa finau atu le tamaitai loia, o lona tiute o le fesiligia o le galuega a leoleo auā o lona lea aiā tatau i lalo o le tulafono.

Mo le silafia o Sauafea na molia i le masina o Setema o le tausaga ua mavae 2014, lea na loka faatasi ai ma lona atalii laitiiti 3 tausaga le matua. O se gaioiga a leoleo na mapuna mai ai le tele o faitioga ma tuua‘ia ai le faatinoga o le tiute o leoleo i lalo o le tulafono o loo latou puipui ma faamalosia. O lea la faatoa fofogaina le moliaga o le lē laiseneina o le taavale na malaga ai le tamā o Sauafea na mafua ai ona loka e leoleo. Peitai o le lavelave o mataupu i le tulafono o loo fesiligia e lana loia ua maua ai se finagalo o itu uma o loo aafia i le mataupu, e sili ona faaleaogā atoa taualumaga sa faatino i le faamasinoga fesoasoani, ae tuu atu loa le mataupu e suesueina i le faamasinoga faaitumalo.

Faaalia e le tamaitai loia e iai sona faanoanoa i le galuega a le ofisa o le faamasinoga ona sa faapea latou silafia le lavelave o le mataupu, ae ua faatulaga le moliaga e suesueina i le faamasinoga fesoasoani ae lē o se isi faamasinoga. O itu o loo tuliloa e le loia o le faatinoina o le faaiuga a leoleo e loka lē o loo molia ae o loo iai isi itu faasino i le taavale sa aveina e le tamā e tatau ona silasila i ai le tulafono. O le a faatoa toe su‘eni ia vaega uma pe a mautu se aso e toe fofogaina ai le mataupu lenei i le faamasinoga faaitumalo.

O le Aso Gafua le amataga o lenei vaiaso fou ma lenei masina fou o Mati o le a valaauina ai le moliaga i lea faamasinoga ona iloa ai lea o se aso tonu e toe faatino ai le suesueina o molimau a leoleo ma molimau a lē o loo molia.

O se faaiuga e taunuu i ai lenei faamasinoga e ono mafai ona faaaogā i se isi finauga faaletulafono i se tasi o mataupu o loo taoto i le faamasinoga, o le tagi poo le su a le aiga o le tamaititi 3 tausaga faasaga i le matagaluega o leoleo.

Le tamaitai loia Leulua‘ialii Olinda ma le tamaitiiti le atalii o Sauafea Siaosi, lea na loka faatasi ma lona tamā i se faaiuga a leoleo