Vave taai fala o le Manu i le Quarter Final

O ata o ta‘uleleia na valivali mai i le amataga o le taamilosaga lakapi taitoafitu a le IRB i le vae i Ueligitone i le faaiuga o le vaiaso, i le malo sosoo o le Manu Samoa i taaloga e lua o Pool Games, na manumalo ai ia Kenya ma Tonga.

 
Matagofie le taumafai ma le gaioi i le faagasologa o pasiga ma le faatamoega o le polo i le taaloga ma Kenya, auā e lē taumate o se taaloga faigata ona e lē o toe tuumāmāina e se tasi le ‘au a Kenya.

 
Ae o le vave lava o le faaaogāina o avanoa, e maua ai e le Manu le polo ma osofai ai le puipui mai a Kenya. Na mae‘a le taaloga ma manumalo le Manu Samoa i ‘ai e 24 i le 12 a Kenya.

 
Sosoo lea ma le taaloga lona lua na fetaui ai ma le ‘au a Tonga, ua atili ai ona faavevela le kipoki koko a le autapuai ina ua toe manumalo foi i ‘ai e 31 i le 7 a Tonga. O nai sasi laiti lava na maua ai le sikoa a Tonga i le taaloga lea, ae na semanu e uma lava le taimi e leai se ‘ai.

 
Peitai na manino mai lava le taunuuga o le taamilosaga mo le tatou Manu, ina ua malolo i le taaloga ma Ausetalia, toe faatamala lava i nai minute o le taaloga, o le manumalo lava sa tatau ona alu ma Samoa.
Na fai si tuai o le faasologa o pasiga, tele le polo pa‘ū ma le faaletonu o le pue, pe a fua atu i taaloga ua mavae, aemaise o le tele o le ‘au fou na suitulaga i nai tama sa faamanu‘alia.

 
Ua taumate i se isi itu, pe o le timuga ma le maseesee o le polo i le taimi o taaloga mulimuli nei, le mafuaaga o nai faaletonu o si a tatou Manu Samoa. E ui i lea, na faia‘ina ia Ausetalia, ae na maua lava le avanoa e sao ai i le Quarter Final o le ipu autu, lea na fetaui ai ma le ‘au a Egelani.

 
Sa fai si faigata o le taaloga lea i le maitau, i le malosi o le puipui a Egelani ma le saoasaoa o le tamomoe e pei ni vaalele tau le o a latou tama, ua tele ina faaaogā lea metotia e faatoilalo ai si a tatou ‘au. Aemaise o le misi tele lava, ina ua lavea le tasi o a tatou fetu faamoemoeina ia Tulolo Tulolo i minute muamua talu ona amata le ‘afa muamua o le taaloga.

 
Na sasi lava le pue a le Egelani, see le vae o Tulolo ma lavea ai. Na ave ai lava i tua e lei mafai ona toe faaauauina le taaloga. Na ona faaletonu lava o le togiina i totonu o le polo o le laina i fafo a Egelani ma mamao i tua, sapo e Fale Sooialo ma maua ai le tatou avanoa e sikoa ai i le tulimanu. O lea na muamua tau ‘ai ai Samoa e 5 i le leai, ina ua lē manuia le aa i le pou, ee ai lava ma le sailigi o le malologa ua mae‘a le ‘afa muamua o le taaloga, o finau lava Egelani mo sona ‘ai.

 

Na o i tua le Manu mo le malologa ma le manatu maualuga a le tatou autapuai, o se mea malosi lea o le a toe osofai mai i le ‘afa mulimuli o le taaloga, ae pagā lea, ua salu vale le lau taamu a Aopo, maalili ai ma le ki koko e lē toe tau ‘ai le Manu Samoa.

 
Na ona lua lava o sikoa sosoo a Egelani i nai minute talu ona amata le ‘afa mulimuli, ae manino loa le ata ua vave taai foi fala o le Manu, ua lē sao i le Semi Final o le ipu autu, ina ua manumalo Egelani i ‘ai e 21 i le 5 a Samoa.

 
E ui i le lē ausia o le sini autu o le taamilosaga mo se avanoa e tausinio ai i le ipu autu, peitai na tasi le faamoemoega na totoe, o le finau loa mo le ipu mafolafola (Plate). E! ua siliga taliiseu foi se tala fiafia mo le autapuai. Ua moni le upu, ‘e fai foi o lena, a o lenei’.

 
O le manatu atu i lau tapuaiga ae ua lē ogatusa ma le malosi o nai tama. O le Semi Final o le Plate lea na faamoemoe e maua ai se tatou ‘ai i le taaloga ma Kanata (Canada), ae na faamo‘amo‘a ai tatou ma manumalo ai Kanata i ‘ai e 27 i le leai a Samoa.

 
Sa fai si faanoanoa i le toatele o le ‘au manunu‘a a si a tatou ‘au, ma e manatu o le ala faaletonu foi lea o le taaloga mulimuli ina ua lavea tigaina le alii o Foma‘i Ah Ki o se tasi o tama lelei o le ‘au, ma ave ai i tua a o lei mae‘a le taaloga.

 
E ui i lea, ua pau lava o le taumafaiga a nai tama ma le faamoemoe o loo iai isi vae o le taamilosaga o loo totoe. Talosia ia toe foi le malosi o le tatou Manu ma toe tulai mai e faaauau le taamilosaga i le vae i Iapani i le aso 22-23 o Mati.

 
O Niu Sila lea ua manumalo i le taitoafitu i Ueligitone ina ua malolo ai le ‘au a Aferika i Saute sa la sue siamupini, ina ua lami i le 21 ‘ai a Niu Sila i le leai. Ua toe pa‘ū mai ai nei le tulaga o le Manu Samoa i le tulaga 6, i le mae‘a o le vae i Ueligitone, mai le tulaga 5 sa iai i Las Vegas.

O le faatulagaga nei o aulakapi a le taitoafitu:

Team    Pts
New Zealand    99
South Africa    97
Fiji    73
England    68
Australia    59
Samoa     57
Argentina    53
Kenya    47
Canada    43
France    38
Le alii o Tulolo Tulolo i le taaloga ma Kenya