Vavala mai ata o manuia mo alo ma fanau sitiseni NZ e fia ulufale i Iunivesite i Ausetalia

Na matuā faaalia le agaga faagaeetia o nisi o alo ma fanau ua foufou mo Iunivesite aemaise mātua ma nisi sa auai i le Iunivesite o Grifith, ina ua faalauiloa aloaia nisi vaega tāua e le Minisita, Hon. Dr Craig Emerson MP (Tertiary Education minister and member for Rankin QLD). O se faatasiga na vaaia le lagolago e taitai o mafutaga ma le toatele o le paia o Samoa aemaise faafeagaiga, alo ma fanau aoga, lea na faia i le taeao o le Aso Lua, aso 11 o Iuni i le Iunivesite o Grifith.
O lenei tala fiafia mo tatou tagata o aumau i Ausetalia, i latou e sitiseni Niu Sila, e amata atu i le aso 1 o Ianuari 2015, o aiaiga o tamaiti malaga mai sitiseni Niu Sila mo le visa faapitoa lea (Special Category Visa) a Ausetalia e faatagaina mo le toatele o tagata sitiseni Niu Sila e taunuu mai i Ausetalia, o le a agavaa ai mo le (HELP) Higher Education Loan Program, pe afai na latou ulufale mai i Ausetalia, a o 18 agai i lalo le matutua poo le 10 tausaga ae lei faia apalai, tagata nofomau i Ausetalia 80 pasene i le 10 tausaga talu ai, pe na  nofomau i Ausetalia i le 18 masina i le 2 tausaga ua tuanai i le taimi o le apalai.
E mautinoa aiaiga faapitoa ina ia aumau pea i Ausetalia i se taimi faatapulaaina e aunoa ma se toe malaga ese ma le atunuu. E toatele tamaiti Samoa ma le Pasefika sa lolofi atu ma pulunaunau i le fia faalogologo i le saunoaga a le alii minisita, pe a faatusa i le toatele o nai fanau sitiseni Niu Sila ua tele ina faavaivai i le lē taunuu o a latou miti ona o le taugata tele o pili e sue ai se faailoga i se iunivesite.
E ui lava la i lenei taimi umi e faatoa taunuu lea fuafuaga, ae o le agaga faafetai i le toatele o faafeagaiga aemaise tupu ma ee o le atunuu i lenei itu faapea le mafutaga a le Leo o tagata Samoa i le peresetene ia Faimalotoa Ioane Pale, tofa ia Vaaaoao Faamatuainu Alofipo, auā tasi lenei o mafutaga e toatele faafeagaiga o loo galulue ai, e le gata o le EFKS, Voice of Christ, Worship Center, Aso Fitu ma nisi ekalesia.
E momoli le agaga faafetai ia i latou nei ma le faaavanoa pea o latou taimi ave fua e fesoasoani auā e ui ua avea i latou ma tagatānuu Ausetalia peitai ua lē ‘alo lava i le ata o le laau ae talatalafulu ma faaaogā o latou tomai e tuu tuu lima mai ai lea fesoasoani mo i latou o fia moomia.
O le isi fautuaga mo nai o tatou tagata Samoa, a maua loa le avanoa ia putiputi aua le fiugofie. O le a faaagaga e le faigamalo le $10.6 miliona mo le isi 4 tausaga auā lea fuafuaga.
Mo nisi la faamalamalamaga atili e lelei ona asiasi atu i le website lea: www.studyassist.gov.au/faq-nz poo le Minisita i le ofisa 02 6277 7420.