E toatasi mai le toafā o tagata Pasefika, ua aafia i gasegase e pei o le suka, toto maualuga ma isi, e mafua mai i le tino puta
E taivalu vaiaso e faagasolo ai le polokalame sa faatautaia e le alii o David Hill i Otahuhu, ma e toatele le mamalu o tagata Samoa o loo auai atu i ai, ma faaaogā lea a‘oa‘oga tāua. O se polokalame e faapitoa mo le faapauina o le mamafa o le tino, ona o le manao i le tulaga o le soifua maloloina mo soo se tasi.
E lei manuia se tamafanau a le atunuu i le lui ma le tulaga sa taulai i ai le faamoemoe mo le valu vaiaso ua tuanai. Peitai sa ta‘ua e le alii o loo taiulu ma faagaioia lea polokalame, le toatele o tagata Samoa ua molimauina ma vaaia suiga tetele i o latou tino, ae sa tautino foi i fesuiaiga ua oo i ai o latou finagalo i le mafaufau ma lagona.
Na ta‘ua e David Hill, e moni o le manumalo e matagofie, peitai o le manumalo o le tagata lava ia ia te ia, o le taumafai lea e mulimulitai ma taulai i auala ma le faatinoina o le galuega fesoasoani mo le tino. O taumafa, o le faia o faamalositino, ma le tele o isi fuafuaga e o faatasi ma le auga ma le sini i le faapauina o le mamafa.
E mafai ona faamaonia e le tagata ia te ia lava suiga o lona tino ma le mafaufau, ma silafia ai le aogā o le polokalame mo ia lava. O le ala foi lea ua saga faaauau ai pea ma tulituliloa lea faamoemoe tāua mo tagata lautele.
O le alii o Damien Martin, sa ia mauaina le manumalo i le isi taamilosaga faato‘ā mae‘a atu. E 98 kilo sa faaitiitia, ma ua aveesea mai le tino o lea alii, a o taumafai ai i le polokalame mo le tolu tausaga. O le 98 kilo e pei ona faapauina mai le alii o Damien, e tusa lea ma le 196 poloka pata (blocks of butter) i lona tuufaatasiga i se fua taulalata mai, ma ua mafai ona e silasila i ai i le ata e pei ona lomia.
O se fiafiaga sili i lea alii e pei ona faamaonia mai e le alii pule o le polokalame, ina ua mafai ona toe faafoi aafiaga o le toto maualuga sa aafia ai i se tulaga masani. E lē gata i lea, a ua fiafia foi e auai ma ua avea o se alii taalo i le taaloga netipolo, aemaise ai le faia pea o faamalositino i le fale koleni.
O lona tina ma lona uso sa molimauina, ua maliliu i le ma‘i o le soona puta ma aafia ai i le ma‘i tumau o le suka. Sa ia ta‘ua i sana tautinoga e faapea, ana lē faamalosi e auai i le polokalame, semanu ua maliu foi i le faasologa ma‘i lava lea a le latou aiga.
O loo faaauau pea le polokalame, ma e taivalu vaiaso e faagasolo ai, ma o le alii o David Hill o se alii faapitoa mo le tuufaatasia o taumafa talafeagai, paleni ma tatau mo le tino, auā lava le soifua maloloina ma le ola lelei.
O le aso tolu o Me, ua fuafuaina e toe amata ai le isi vaega o le polokalame mo le valu vaiaso. O loo tatala pea le avanoa mo soo se tasi e fia auai, i le na o le $25 i le vaiaso e totogi. O le nofoaga a le Otahuhu Convention Centre o loo faia ai lea a‘oa‘oga tāua ma le telefoni 276-8207.
E tusa ai ma faamaumauga faasoifua maloloina i itumalo eseese a Niu Sila, o loo faamaonia ai le sili o pasene o le itumalo Counties Manukau. E 67 pasene e pei ona faamauina i le taimi nei, ma ua faaluaina ai pasene e 32.2, mai itumalo uma o le atunuu, ia i latou ua maua i le faamai o le soona puputa se‘i tulou le gagana (obesity).
O se isi fua faataitai e pei ona faamaonia mai e le fomai, Dr Brandon Orr-Walker, e toatasi mai le toafā o tagata Pasefika, ua maua i le faamai ma le gasegase tumau e pei o le suka ma le toto maualuga, e mafua mai i le tino puta.
