Ua faamauina nei i talafaasolopito o taumafaiga ma atina‘e a tamafanau a Samoa se isi matatia maoa‘e i le tomai o le saunia ma le faatinoina o se ata tifaga, ina ua maua e le ata tifaga o le Tulafale poo le The Orator, ni faailoga se valu i le tufaga faailoga o ata tifaga a Niu Sila na faia i le po o le Aso Lua, aso 4 Tesema.
O le tufaga faailoga a le Sorta Inaugural Unofficial Film Awards na pito tele ai faailoga na maua e lea ata tifaga sa pueina i Samoa lea sa tusia ma faatonutonuina e se isi alo o le atunuu le susuga Tusi Tamasese ae faatino vaega uma o le ata e nisi o tagata Samoa sa filifilia. E sefulutasi faailoga na tauva ai le Tulafale, ae valu na manumalo ai, e pei ona maua e le faatonu o Tusi Tamasese le faailoga o le faatonu silisili ona maoae lona faafoeina o le faatinoga o le ata poo le Best Director, ae maua e le alii puupuu o Faafiaula Sagote le faailoga o le tama autū o le ata ua maoa‘e le faatinoga o lana vaega poo le Best Actor.
O Faafiaula Sagote o loo faaigoa i le ata o Sa‘ili, ae o le tamaitai o Tausili Pushparaj lea e faaigoa ia Vaaiga na ia maua le faailoga o le Best Actress poo le tamaitai silisili ona lelei faatino ana gaioiga uma i le ata e fua i le tala sa faailoa e le Tulafale.
O le tamaitai o Salamasina Mataia na ia maua le faailoga o le Best Supporting Actress poo le tamaitai sa lelei lana lagolago ile faatinoga o le tala ile ata tifaga, ma le faailoga o le aotelega o ata tifaga silisili ona lelei tapena ma faatino le Best Film Award na maua e le Tulafale.
Na maua foi e le ata tifaga lenei le faailoga o le ata e lelei pese sa faaaogāina atoa ai ma le lelei tapena o ofu poo laei o tagata sa faatinoina le ata. Sa faamasinoina faailoga eseese o lea faamoemoe e tagata popoto i fafo i le saunia o ata tifaga faapea i latou ua iai agavaa i le tapenaina o ni sauniga tetele poo festivals faapea ma ni tusitala.
E iai ma nisi o ata tifaga i totonu lava o Niu Sila sa maua tulaga i lea tufaga faailoga.
