Valoia le pau o totogi o auaunaga telefoni feaveai

Ua faafetaia e le Pule sili o le kamupani o fesootaiga a le Malo, le SamoaTel le alii o Mike Johnston le fuafuaga a le Malo na faatu ai le faamasinoga faapitoa tau fesootaiga, le Telecommunication Tribunal, ua mafai ai ona finauina mataupu tau i lea auaunaga. O le a aoga tele lea faamasinoga tau fesootaiga mo le lumanai i nisi mataupu e ono feteenai ai auaunga tau telefoni, initaneti, ma isi ituaiga o fesootaiga faaonaponei.
Ua faailoa mai e le alii Pule sili o le SamoaTel, o le a pau le totogi e faaaoga ai e le atunuu auaunaga tau telefoni feaveai, e mafua i le faaiuga a le Tribunal ua poloaina ai le pule faatonu poo le regulator e toe iloilo le totogi o fesootaiga i le va o le SamoaTel i lana telefoni feaveai, le Go-Mobile ma le isi kamupani telefoni feaveai o le Digicel. O le taimi nei e 8 sene o loo totogi atu e le Digicel i le SamoaTel i le valaau e tasi pe a valaau atu se isi mai le Digicel i le SamoaTel, ae e 30 sene e totogi e le kamupani o fesootaiga i le Digicel pe a valaau se tagata mai telefoni laina ma telefoni feaveai a le SamoaTel agai i le Digicel.
Faaalia e Johnston o le a palasi i lalo i le 75 sene i le minute a le Digicel i taimi e pisi ai fesootaiga e pei ona iai nei, e faatusa i lana telefoni Go-Mobile e 34 sene i le minute i soo se taimi e faaaoga ai. O le manumalo o le SamoaTel i lana talosaga apili ua faaalia e Johnston, o se alāfua lea mo le luamanai e faatonutonu ai le totogi o fesootaiga i Samoa.