Faamautu mai e Teleiai Edwin Puni o le pulega a Event Polynesia le taliaina e le Peresitene ia Mapu Jamias ma le Asosi Fusu a Amerika Samoa o le valaaulia e auai i le fusuaga tele o le Sisigafu‘a a Samoa e faia i le Aso Gafua, 31 Me i le faletaalo o le Malo i Tuanaimato.
O tapenaga a le Komiti mo le Faamanatuina o le Tutoatasi o Samoa i lenei tausaga ua faatulagaina ai tuuga fautasi ma faipelega o taaloga aloaia o le Fu‘a, lea o le a faia i le Aso Gafua sosoo ai ma le Lotu Faapitoa i le afiafi ae faauma i le Aso Lua, 1 Iuni i le sisiina o le tagavai o le saolotoga i Tiafau ma faafiafiaga faaleaganuu.
Fetalai Teleiai, “E mataina tele tulaga o faagatama o le a iai o le Fu‘a i lenei tausaga ona o le auai mai o o tatou uso mai le Motu i Sasae. E le gata i tuugavaa ae o fusuaga lea o le a lu‘i ai e Amerika Samoa le Ipu a le Palemia o Samoa i paga amateur.”
Faaalia foi e Teleiai le tāua o lenei avanoa mo tapenaga a le aufusu amateur a Samoa mo le sauni atu i taaloga a le Commonwealth e faia i Initia ia Oketopa o le tausaga nei. O le tausaga e 2008 na lu‘i ai e le au fusu amateur mai Aukilani le Ipu a le Palemia i Apia lea na manumalo ai le au a Samoa i le ono paga i le lua paga a Aukilani. E toatolu alii fusu o le aufusu amateur lea a Samoa o le 2008 o loo alualu pea i luma a latou taumafaiga i le taimi nei.
O le alii o Hugo Fata o Afega o le aupaga o le Welterweight sa pineauro mo Samoa i le Mini South Pacific Games 2009 i le Atu Kuki ma e iai le talitonuga o se tasi lea o faamoemoega o le au a Samoa i le Commonwealth Games 2010.
O le alii o Farani Tavui o Satupaitea ma Neiafu o le aupaga heavyweight sa avea ma sui o Samoa i taaloga o le Olympic Games 2008; lea o le a fusu faapolofesa mo le taimi muamua i le fusuaga tele o le Sisigafu‘a e fetaui ma Luma Pesefea Aifaalua mai le afioaga o Lefagaoalii i le Itu o Tane.
O le isi alii fusu o Vaitele Soi o Vailele, Taga ma Vaovai Falealii o le aupaga cruiserweight ua taalo nei i Niu Sila. O Vaitele ua sefulutasi ana fusuaga faapolofesa, leai se faiaina, valu fusuaga manumalo i le tu‘i oti. O Vaitele e fusu i le Aso Toonai nei, 22 Me i Tauranaga lea o le a taaalo ai foi ma isi alo o Samoa ia Warren Fuiava o Fa‘ala Palauli ma Lalomalava i le aupaga lightheavyweight ma Pele Faumui o Vaiafai o Iva ma Lalomalava i le aupaga o le middlweight.
Faaalia e Teleiai le toe foi mai o le fiafia o lo tatou atunuu i fusuaga i totonu o Samoa faapea i Niu Sila ma Ausetalia o loo iai alo o Samoa, aemaise lava i tulaga tau fusuaga faapolofesa.
E fitu paga amateur o loo fuafua e saili ai le manumalo i le Ipu a le Palemia i le va o aufusu nei a Samoa e lua. O le Aso Toonai e sosoo ai, aso 5 Iuni o le a taaalo ai le aufusu mai Amerika Samoa ma le aufusu a Tumua & Pule i le Ipu a Amerika Samoa lea na manumalo ai Samoa i le Fu‘a a Tutuila ma Manu‘a na mavae atu nei. Mo nisi faamatalaga silasila i le upega tafailagi o le www.eventpolynesia.com
