E lausilafia uma e le toatele o le atunuu, se alo mai Falelima Savaii, ua faaigoaina o le Nifoloa, ona o ana fatuga faaonaponei, lea foi toeitiiti soo ai tulimanu e fa o le kelope, i ana koneseti faamusika.
Poo le ā le mamao, o se nofoaga e tatagi ai faafiafiaga a le Nifoloa, e mautinoa lava, le lolofi atu i ai, ona o le talenia o lana susuga.
Na valaaulia faapitoa i le tatalaina aloaia o le faili a le Exodus Band, i le Greek Orthodox Hall Bankstown, i le Aso Toonai.
E lei iai se tulimanu o lenei nofoaga na avanoa, na malilie lava le atunuu e tutū ona ua tumu saisai, ae se‘i fai le faiva o tapuaiga, e lē gata i le tama pese tautaua, ae mo le fia faafofoga foi poo ā ni lelei o le faili fou lenei o le Exodus.
O le afioga i le alii pule, Seulu Willie Tuitama, o ia foi na fofoaina lenei taumafaiga, e lē gata i le tau sailiina o ni aumusika e fetaui lelei ma ona faanaunautaiga, ae o le tuufaatasia o le faatulagaina.
Na faaigoaina o ia i le tuagane o lona tina, le isi foi alii pese logologoā, le susuga ia Willie Tavita. Faato‘ā tolusefululua tausaga o lona soifua, ae o lea ua tino mai lana miti, o le faia o sana ia faili.
Sa faaaogāina foi lana taleni, e auauna atu ai i ni tausaga se tele, i faili a le Royal Polynesian ma le Tautua.
O le alii o John Laupepa, le isi foi sui lagolago, ua lauiloa foi i lenei lava taleni, lea na tautua ai i faili a le Oriana, Faugagana ma le Legends.
Faapea foi le afioga ia Seiuli Riordan, o tama tuai o le musika, ua loa foi tausaga o faamalieina finagalo o le atunuu i Sini nei.
O isi sui nei o le Exodus Band. Alii: Tiz Tana Ta‘ta ma Darwin Darwin lea foi na tusiaina le banner e faalauiloa ai le suafa o le faili. Tamaitai: Louise Su‘a, Irene Leleimalefaga ma Laga Tofilau.
I le molimauina o a latou pese i lea po, e matuā manaia lava le suifefiloi, mai le RNB, Reggae, Dance, Techno ma pese atumotu e aofia ai ma Samoa.
E lē na o le tupulaga e fiafia i ai, ae faapea foi na toe faaiila ai ma siva a le au old generators, ta‘ua e le Laughing Samoans. Se ua muliga foi le lotolotoi o le maketi i Fugalei i taeao o Aso Toonai i le taufaoga o meamata, i le tau sailia o se vaipanoa i luga o le foloa, e sisiva ai le toatele, ona ua seki lava le Exodus Band.
Ave atu le faamalo a le tatou nusipepa ia te outou uma, le malaga mamao mai a le Nifoloa, aemaise le alii pule ma sui uma o la outou faili, se ua ta fia Falealili fua.
E lē faagaloina foi a lua Susuga Pesefea Lynch, alii faasalalau mai le Fofoga Moomia, ma Fritz Helg mai le Dee Jay Ezy, ona o lo tatou galulue felagolagomai i le tau faailoaina o taleni faapenei ona o le fia tautuaina o si o tatou atunuu pele.
Ona taunuu ai lea o upu masani, ‘faato‘ā talitonu lava Toma ina ua vaai’.
E lē gata i le matautia o le faamomoiloto o le alii o Nifoloa, o le aulelelei, toe laiti le au faili.
Ae faafetai ma viia le alofa o le Atua, auā e tusa lava pe o le ā le tigaina i le tele o a latou faataitaiga, pe uma ni a latou tupe ia latou tapenapenaga ma le manaia o le togiga, ae ana leaga le supper ma paulua o latou siufofoga, ia ua leva foi ona tomumu le malo pipo.
