Valaaulia le Minisita o Femalagaiga e Ao Sinasina

O le Aso Tofi talu ai na tuufaatasia ai Ao Sinasina o Sini i se mafutaga faamasani faaleuo na faamaopoopoina e La‘u Samoa faapea le Western Union. O le Afioga i le Peresetene ia Alaalatoa Emani na saunoa e faafeiloaia le Paia ma le mamalu o le Aofia lea na valaaulia ai le Faafeagaiga ia Asofitu Leatuvao e momoli mea i Matautu Sa.Na auai foi le Afioga i le konesula o Samoa Tofa Manogiamanu Fonoti Etuale Ioane ma le faletua, Peresetene o le Fono Aoao a Tagata Samoa i Sini Fetalaiga Teleiai Sonny Wilson ma le faletua aemaise le Alii fomai Seagaitumua Dr Paniani Patu ma lona faletua ia Minerva Patu.
I se saunoaga a le Afioga i le konesula, “O le tāua tele o le iai o tuaa matutua ma ao sinasina i se aiga o le saili lea i ai o le uta ma le tofa loloto”. Na saunoa foi le tofa ia Manogiamanu Fonoti Etuale, “E afua mai mauga  manuia o se Nuu ma o le mafutaga a tuaa matutua o outou e fautuaina manuia o Samoa i Sini nei.”
O sui o le faigamalo a Ausetalia na auai e aofia ai le Pulenuu o Canterbury le afioga Bryan Robson lea na saunoa i le matagofie o tu ma agaifanua a Samoa na ia molimauina i lana malaga atu i le 1972.
O siva ma pesepesega aemaise le olaga faaaloalo o tagata Samoa i tuaa sinasina ma matua e maoae tele e pei o le molimau a le alii pulenuu o Canterbury. O ia tu ma agaifanua ua malaga mai ma o tatou tagata ma fesoasoani ai i le atinae o Canterbury ma Sini nei.
Na saunoa foi le Taitaifono o le fono Aoao a tagata Samoa Teleiai Sonny e faamalo ma faafetai i le Lau Samoa ma le Western Union mo le tofa ma le faautaga ua mafua ai lenei aso. Na tapenaina foi e le Fono Aoao sa latou pese ma se Siva e faapine ai lenei Aso. Na uluai sisiva le mafutaga a Campbelltown sosoo ai Mt Druitt i a latou togiga felanulanuai.
O le taimi muamua foi lenei na valaaulia ai le Minisita Fou o Femalagaiga le Afioga ia Tony Burke talu ona faauuina lona tofi i le aso muamua o Iulai 2013. O se tasi e tupuga mai Aialani ma na saunoa i le tāua o le faasinomaga o le tagata i le aumau a i Ausetalia nei. Ua sauni foi le afioga i le minisita e atili faamalosia le galulue ma Lau Samoa faapea mafutaga Samoa i Sini nei i vaega o moomia ai le tautua a le vaega faaupufai o le Leipa (Labour).
Na taualuga le Aso i le faaalia     foi o le agaga fiafia o le sui o le Western Union ia Eseta Ale mo le lagolagoina o lenei faamoemoe. Na saunoa Alalatoa e maeu foi le agaga lagolago a le afioga i le Pulenuu ma le Minisita i le faatalauula atu aemaise lenei vaitau o le faatupulaia o tatou tagata Samoa ua autovaa mai Sini Ausetalia.
Na ta‘ape le fuamanusina i  le mae‘a o se taumafataga mamafa na tali ai le sua ma sisiva ai le aofia i le faili mālie a Papalii Steve Toomalatai a o lulu aao ma faamavae sui valaaulia ma le ao sinasina.