O le Aso Lulu 15 o Ianuari 2014 na falelauasi ai le tina peleina ia Silila Lauagaia Lily Helg (73) i le fanuatanu i Woronora i le pitonuu o Sutherland i Sini nei. O se molimau o le soifuaga o lenei tina na faaalia ai ona uiga tausaafia ma le agamalu aemaise le alofa i lana fanau ma lona aiga atoa.
E tuumalo le tina i le afiafi o le Aso Sa, 5 o Ianuari faatoa tolu vaiaso talu na maliu lana tautoga mo tausaga e tele le susuga Arthur Helg (90). E moni ai upu, “Ua na o le tuugamau e tatalaina le alofa Faavavau. Amuia e Oti oi le Alii, aua ua malolo mai a latou Galuega lelei.”
O le po o le Aso Lua 14, o Ianuari na faagasolo ai le sauniga a le aiga i le malumalu lava a le Ekalesia Uniting i Bankstown. O le taitaiga o le sauniga na feagai ma Ps Joey Helg ma le faitauina o le Tusi Paia e Ps Siaosi Tau Kamuta.
Sa lasi ma matagofie molimau a le fanau ma aiga faapea uo i se tina e leiloa pe ita i se tasi. “Ua misia e le tatou aiga se uso poo se tina o si aiga toe tausi ekalesia i Samoa i taimi o soifua ae lei masii mai i Ausetalia.” O le vaega lea o le molimau a Taua Ena Schwalger le uso o Silila.
“E ui o lenei taimi o le faavauvau e lelei le Alii. E lelei le Alii ma lona alofa ua ia foai mai ai si o matou tina pele sa matou mafuta,” o le molimau lea a le ulumatua ia Edmund Helg na tauasa mai lava i Amerika Samoa mo toe sauniga.
E toafā alo o Silila ma Arthur Helg ia Edmund ma lona toalua ia Leilani Retzlaff Helg, Ramona Helg Thompsen, Fritz Arthur Helg ma Eunice, Seiuli Jerry Bryce ma Suzie Naoupu Helg, Ramona Helg ma ona alo e toaono foi. O Fritz ma Eunice ma o la alo e toafā. Seiuli Jerry Bryce ma Susie Naoupu Helg ma la fanau e toalima.
Na mae‘a molimoli atu ai lona tino maliu e tofa i le maota o le aiga i Regents Park ma toe sauni atu ai i lona toe sauniga i le aso na sosoo ai. O se aso lagi lelei toe sauniga na taitaia e le Faifeau ia Rev Ainuu Mali‘oli‘oao Sekai.
O le Molimau a le fanau na saunia e le susuga ia Fritz Helg. “O le tala lava e manatua ai pea si o matou tina o lana faamalosi ia matou.”
O le Afioga Ainuu Iva Chan Chui le uso o Silila na malaga mai Samoa sa fai ma sui o le aiga i le sauniga o le toe aso o si o latou uso matua. “O le uiga lava o si o matou uso i Samoa e manatua ai pea o le tausi aiga lelei faapea le Ekalesia.”
O le Ekalesia Faapotopotoga Kerisiano i Samoa faapea le Ekalesia Metotisi sa faapea na auauna ai o ia a o faamautu i Togafuafua.
“O lana masani o Aso Faraile e alu atu ai asiasiga a le faafeagaiga i aiga taitasi, e lē gata o le manogi ma le sasala o gasesega ma kuka e tali ai le sua ae faapolopolo lava se seleni e talimasegei ai le afifio atu o le faafeagaiga.”
“O nisi o taimi a o malaga i atunuu mamao e vili atu lava i le fanau ma le aiga e tautuana teu o le falesa i taimi e tu masina ai,” o se toe manatu lea a Filisita. O uiga tautua Lotu nei o si matou uso talosia ia faaauau e le fanau ma fanau a le fanau ma manatua ai pea si o latou tina.”
“O nisi o taimi e malaga ai i atunuu mamao e vili atu lava i le fanau ma le aiga e tautuana teu o le falesa i taimi e tu masina ai,” o se toe manatu lea a Filisita.
O le sui o le aiga na malaga mai i Brisbane o le Afioga Sa‘u Faalafi Ieremia Lale, “Ua malaga Silila ae ua manumalo i le soifuaga i lalo nei ma sa faia uma nai ona tiute ma le faamaoni. Ia manuia Tele lau Malaga ma e lē galo oe.”
Na matagofie foi pesepesega ma viiga na molimoli ai toe saafiafiga a le fanau a le fanau ma le aufaipese a le aiga na faafoeina e le Afioga Seiuli Tavete Liuliu o ia foi na avea ma fofoga taumomoli o toe sauniga o le tina.
Na mae‘a le sauniga ona molimoli atu ai loa lea e le auaunaga a le Falemaliu a Pepe Pula Epati Maneta le sa o le tina ia Silila mo lona nofoaga tumau i Woronora ma tofafā faatasi ai ma lana manamea ia Arthur Helg.
Sa taualuga le aso o le tina i se taumafataga matagofie na saunia e le aiga ma faagasolo ai foi faaaloaloga masani a o lei ta‘ape le fuamanusina ma le agaga o le fiafia ma le faafetai tele.