O le tutonu o le la i le Aso Toonai na se‘i mavae atu nei, na faatumulia ai le maota o le galuega, ona o le feiloaiga a le matagaluega ma le tofi ua valaau i ai le Atua e tausi nuu i Camira.
O le mae‘a ai o le osiga o le feagaiga a le Matagaluega a Inala ma le latou faafeagaiga, sa faapea ona toe molimauina ai e le aofia ma le paia o le atunuu se isi foi ‘ava o feiloaiga e pei ona fesuia‘i laau o le faatoaga i Kuiniselani.
Ua 2 masina o tulimatai le matagaluega a Camira i se aso e feiloai ai ma le latou tofi fou, e tusa ai ma le toe suigā tofi a le Faasinoti ma le Ekalesia aoao.
O le susuga i le tausi matagaluega ia Rev Mika ma le faletua ia Lola Sami sa tausia le matagaluega a Papakura i Niu Sila, lea ua siitia mai auā le galuega i le nofoaga o Camira.
O le faafeagaiga taulagi e susū mai le afioaga o Tiavea & Lufilufi a o le faletua e mai le alalafaga o Safotu & Lefagaoalii i Safune.
Talu ai ona sa fefulisai faalaau mamafa e pei ona silafia, poo fea a agi i ai le matagi, o lea na tasi ai le faafitiga o ‘aleaga, e avea lava lea aso e tasi e fai ma aso nai Amoa e faataunuu ai lea foi fuafuaga ua alagatatau.
Sa faatumulia e lē gata i le faasinoti a Kuiniselani ae sa faapea ona tauaofia ai nisi o tamalii ma failauga faapea tupu ma e‘e o Samoa mai isi tovine tapuai.
O le susuga foi ia Rev Sa‘iliai Tuma‘ai sa taitaia le sauniga amata e tapasa ai le galuega fou o le a feagai ma lana auauna ma le aiga.
Na faia le ‘ava o feiloaiga, ma o le tofā ia Peilua sa lauga ma feagai ma tulaga masani mai le matagaluega.
Sa tu i le tootoo le tofā ia Sola mai Aukilani e talifuaitau e pei ona autasi ai finagalo o aiga na lua o le susuga i le faafeagaiga ia Rev Mika ma le faletua ia Lola Sami.
E taape le aofia i lea afiafi ua faasolo ina goto ifo le la i lona nofoaga tumau, ma e ui ina ma‘ati‘ati pea le mālūlū i le savili, ae na a‘e manuia ma tini lau o le faamoemoe.
