Valaau Lei‘a Misa e lona matai a o tauivi pea ma le gasegase

E lē faigofie i le Pelesetene o le Toomaga le faletua o Siliniu Lina Chang le mafutaga ma le alo teine talavou o Lei‘a Misa a o feagai ma mafatiaga o le gasegase o ona fatuga‘o, ina ua valaau le matai i le afafine a o faataotolia ai i le maota gasegase o Tupua Tamasese Meaole i Ulumotootua.

“E lē faigofie le matou galuega ona o le naunau e saili se fesoasoani mo Lei‘a”, o le finagalo lea o Siliniu Lina ina ua tapa sona finagalo ina ua maua tala ua maliu le tamaitai o Lei‘a Misa ina ua faigata ooooga o lona gasegase.

E lua tausaga o feagai le faalapotopotoga o le Toomaga ma fesoasoani mo le aiga o le tamaitai, ona sa moomia se fesoasoani tau tupe i le feaveaiina mai i le falemai, mo le faia o ona togafitiga i le faamamā o lona toto. Sa saili foi le Toomaga mo se tagata e featui sona fatuga‘o i le tamaitai peitai e iai nisi na ofo mai, ae e lē fetaui.

O le faanoanoaga lava lena ona sa faapea e iai lava se tasi e talafeagai lona fatuga‘o ina ia mafai ona malosi Lei‘a ma toe foi e faaauau lana aoga. O le valu tausaga o le tamaitai na amata ai ona aafia peitai sa lē maua poo le ā tonu lona gasegase.

O le tuanai o le lima tausaga na faatoa iloa ai ua aafia uma ona fatuga‘o, ma faamuta ai lona toe alu i le aoga.

O le faigata o lona ma‘i ona ua na o nai ona mātua ma lona tuagane sa pau le galuega sa maua ai se seleni o le fagota. O le mafuaaga lea o le saili fesoasoani ane i le Toomaga ma sapo ai e le faalapotopotoga ma saili fesoasoani loa. O seleni sa maua e le Toomaga sa tuuina atu i le aiga e totogi ai le taavale e aumai ai Lei‘a i le falemai faamamā toto ma toe ave i lo latou aiga.

O le fesoasoani a le Toomaga na faia i le lua tausaga sa faamoemoe e alofagia e le Atua sailiga ma talosaga sa molia mo se fatuga‘o ae peitai ina ua maliu Lei‘a i le Aso Lulu na tea nei, na muta ai ma faamoemoega.

E tuuina atu lenei lipoti mo le faasalalauina e lei maua mai se faamatalaga i le Toomaga poo afea e faia ai toe sauniga o le afafine o Lei‘a Misa, ae o le saunoaga mai a Siliniu Lina Chang, o le maliu o Lei‘a ua faavauvau uma ai sui o le Toomaga.

Ua ave ai le faafetai a le Pelesetene o le Toomaga ia i latou uma sa agalelei ma alolofa atu ia latou sailiga na maua ai seleni mo lea alo tamaitai o le atunuu.

Le tamaitai o Lei‘a a o soifua ma le Pelesetene o le Toomaga mo ē Puapuagatia, Siliniu Lina ChangO i latou o aumau ma nonofo i atunuu i fafo e lē gata o tagata a o faalapotopotoga eseese, faapea foi i latou uma i Samoa sa avatu seleni ma isi lava vaega sa faaalia ai lo latou agalelei ma lagolagoina le galuega a le Toomaga mo Lei‘a. Manuia lau malaga le afafine, ia maua sou nofoaga mau i le lagi.