E toe faatalofa atu i le mamalu o le tatou atunuu i lenei foi vaiaso, malo lava le tapuai, faafetai foi tatalo ma nonomanu i le Atua, auā lava le alo faiva o tamalii ma tamafanau a Samoa i ona feau masani, aemaise ai lo tatou aumau ai i atunuu i fafo.
O le vaiaso mulimuli lenei mo le afioga ia Vaimasenuu Zita Sefo-Martel, mo le faaauauina ai o lona soifua a‘oa‘oina seia oo lava i le soifua auauna atoa ai ma galuega aemaise taleni o loo faaaogāina ai lona soifua.
Na gata mai le tulaga o galuega i le vaiaso talu ai ina ua tatala le kamupani tumaoti a le afioga ia Vaimasenuu ma le aiga.
O le kamupani a le Polynesian Xplorer sa faavaeina i le tausaga e 1995, ma o loo faaauau pea e oo mai i le taimi nei. O le kamupani o loo agai lana auaunaga e fesoasoani ai i le maketiina ma le faalauiloaina o Samoa i atunuu i fafo o le lalolagi, ma taumafai malosi e faatosina ai tagata tafafao e agai atu i totonu o le atunuu, auā le atinaeina ai o le tamaoaiga ma tupe maua a Samoa.
Tofia e avea ma Konesula o Farani i Samoa
E lei manatu Zita i se tulaga o le avea o ia o se sui o le atunuu, ia poo le galuega foi e pei ona ofoina ane o se konesula o lea atunuu tele mo Samoa. O le alii amepasa o Farani e faamautu i Niu Sila, na agai atu mo sana asiasiga i Samoa, ma faatalanoaina ai lea mataupu e aunoa ma le feiloai ia Vaimasenuu. E talitonu Zita, o le toatele lava o ofisa o le malo o Samoa, faatasi ai ma nisi sinia o le malo, sa latou faailoa ma tuuina lona suafa i le lisi a le sui o lea atunuu i taimi uma e agai atu i Samoa mo lea lava faamoemoe.
E toatolu nisi na faapuupuuina ai le lisi mai le toatele o i latou sa faaulufaleina o latou suafa mo le filifiliga. O le toatolu sa faia i ai le filifiliga a le alii amepasa, na manumalo ai le tamaitai poo le afioga ia Vaimasenuu e fai ma sui o Farani e galue mai lava i Samoa. O le tofia mo lea galuega e tusa ai ma faiga faavae a lea malo, e tai lima tausaga ma suia, e ala i le toe filifili o se isi, ia poo le toe tumau pea o le sui o loo tauaveina le tofiga. Peitai ua mae‘a nei le lima tausaga muamua talu ona tulai mai Zita i le galuega, ma ua mae‘a ai foi ona toe filifilia lona tagata mo le faaauauina o le tofiga mo le isi lima tausaga o muamua. O loo galulue faatasi le afioga i le Konesula i Samoa, ma le sui o lea lava malo i lona Amepasa i Ueligitone i Niu Sila. Faaalia e Zita, o le tele lava o galuega faatino o loo faaaogā ai fesootaiga faaonapo nei.
O le afioga i le Konesula, o loo iai foi le tomai e mafai ai ona faaaogāina le gagana a lea atunuu e fesootai ai, ma faia ai le galuega, ma o le isi lea vaega tāua tele o lona umia ai o lea galuega tāua.
Filifilia kapeteni o le fautasi a le Segavao
E lei faigofie ona talia e le afioga ia Vaimasenuu le faaiuga a le Ekalesia Katoliko i Siusega, ina ia avea o ia ma kapeteni o le Segavao, mo faigamea i le tai. O le lē manuia o taumafaiga a le isi foi tamalii sa avea ma faia‘oga o le auvaa a le Segavao mo nisi o faamoemoega tetele sa tauva ai, aemaise ai le leai o se toe fesootaiga ma le tamalii, na mafua ai loa ona liliu ane le aulotu ma faatū le lafo, ma talosagaina Zita mo lea foi tofiga.
E tele itu sa lē mafai ai ona talia gofie lea faaiuga, ona sa manatu lava Zita, o lea galuega o se matafaioi e faapitoa lava mo le itupa o alii, o le mafusaga foi lea ua ta‘ua ai tuuga fautasi, o le faagatama, ae lē o se faaga a tamaitai. E lē gata i lea, o lona foi tagata o loo tele lava galuega o loo feagai ai, ma o loo taumafai foi ina ia faagasolo pea le agai i luma o lana auaunaga mo le atunuu.
