O le autū ma le faamoemoe o le kamupani, o le fesoasoani lea e maketiina Samoa i atunuu i fafo ma le lalolagi atoa, ina ia faatosina atu ai tagata tafafao, ma agai atu i totonu o le atunuu.
O se taumafaiga sa matuā iloga lona tulai mai ina ua amata ma faavaeina mo le taimi muamua.
O le tele o agavaa ma le tomai o le tamaitai pule mai atunuu i fafo a o feagai ai ma le tele o isi galuega, aemaise ai foi le itu tau femalagaiga mai lea atunuu i le isi atunuu, sa fai lea ma malosiaga o le faatupulaia o metotia ma faiga e fesoasoani malosi ai i le faamoemoe o le kamupani.
E oo mai i le taimi nei, ua agai pea i luma ma tuputupu le tamaoaiga o le kamupani ma ana galuega faatino. Ua savalia ai nei i le tolu ona lālā i totonu o le atunuu.
Ua iai le lālā i le motu tele i Salafai, tasi le isi i totonu o le malae vaalele faavaomalo i Faleolo, ma le isi o loo i le taulaga i Apia.
O loo foi le faamoemoe o le afioga ia Vaimasenuu ma lana kamupani, o le a faalautele mai i fafo o Samoa le auaunaga. O isi atunuu e pei o Niu Sila ma Ausetalia o loo silasila mamao i ai mo le lumanai.
O nisi o kamupani mo malaga i Niu Sila e pei o le Flight Centre, ma le House of Travel, o isi ia o loo galulue faatasi ma soosootau‘au ma le Polynesian Exprorer i Samoa.
O totonu lava ia o le atunuu o loo galulue faatasi ma kamupani vaalele, aemaise ai o faletalimalo uma mo le fausiaina o fesootaiga faaonaponei, mo le atinaeina o turisi poo tagata malaga tafafao atu i le atunuu.
O se molimau a le tamaitai pule, ua matuā siitia lava i luga le maualuga o le fuaninumera o turisi talu ona galulue lana kamupani i lea foi ituaiga galuega, aemaise lava o faiga faatosina i atunuu i fafo ma le lalolagi.
O le vaiaso fou o le a silasila pe na faapefea ona filifilia Vaimasenuu Zita Sefo-Martel, e avea ma konesula o Falani i Samoa.
E lē gata i lea, ae o le a auiliili atu ai foi ma le galuega faafaiaoga o fautasi talu ona amata mai Zita i lea foi tofiga.
Ae pe faapefea foi ona ia mauaina lea agavaa, aemaise ai o se faafitauli sa tulai mai i totonu o le li‘o o kapeteni o fautasi a le atunuu ina ua ulafale i ai Vaimasenuu.
O le a silasila foi ma faitau i isi taleni ma agavaa o loo iai pea lava i le tamalii tamaitai o Samoa, ua maoa‘e foi lona tulai mai i lenei vaitaimi ma le faaaogāina o lona soifua.
