O se galuega tumau mo ia, ae o le taimi lava foi lea sa ofoina ane ai e le leitio faasalalau a lea atunuu, le Radio Caribbean. Sa tauave lua ai pea lava ia galuega mo tausaga e lua sa iai i lea foi atunuu.
O le mae‘a o tausaga e lua i Caribbean, sa toe siitia ai le aiga ma agai i Italia, Roma. O se suiga i le galuega a le tamā o le aiga, faatasi ai ma se moemitiga sa iai ia Zita mo le fia sailiili i nisi o vaega o lea atunuu, sa mafua ai ona faigofie se faaiuga mo le malaga ma nonofo i Roma.
E ono tausaga sa ofoina ane e tatau ona galulue ai i se konekarate sa ofoina ane, peitai e na o le tasi le tausaga ae toe suia le faamoemoe, ua toe fia foi i lona atunuu.
O le tausaga e 1990, na maua ai se faamaoniga ma malilie ma le aiga o le a toe foi e fia tautua mo le atunuu i Samoa, ma faaaogā agavaa ma tomai e auauna ai.
Na tuua Roma i le tausaga lava lea ma le aiga ona toe taliu ai lea i Samoa e pei ona malilie i ai. Sa faigofie ona faagaioi mea uma ina ua faamaonia ane foi le galuega a le tamā o le aiga i Samoa lava, mo le matagaluega a le Conservation International.
Na taunuu i Samoa ona galue lea o Vaimasenuu i le galuega faafaiaoga mo le kolisi a St Marys, ona o ia foi o se tamaitai tuai sa a‘oa‘oina ai i lea a‘oga a o lei agai fafo mo le faalauteleina o le soifua a‘oa‘oina.
O se taimi tāua tele lea taimi e pei ona molimauina e Zita, aemaise ai o lona taimi sa ofoina fua e lē totogia mo le faatinoina o le galuega.
Na sosoo ai ma le toe ofoina foi o lana fesoasoani mo lea lava galuega mo le a‘oga a le ekalesia lava i Sagele.
O le mataupu o le Igilisi poo le gagana Peretania, sa a‘oa‘oina pe sa faiaogaina foi e Vaimasenuu mo taussga sa galue ai mo kolisi e lua e pei ona ta‘ua.
O le tausaga e 1995, na suia ai le agai i luma o le soifua galue. Sa silasila ma vaavaai toto‘a i se avanoa e amataina ai se kamupani tuma‘oti e onaia lava e ia ma le aiga, ina ia avea ma alagatupe ma le manuia mo le lumanai.
O le tausaga lava lea na faavaeina ai loa le kamupani, ua faaigoaina o le Polynesian Explorer.
