E toe faatalofa atu i lenei foi vaiaso i le mamalu o le tatou atunuu, aemaise o le aufaitau a le Samoa Times, i ana paaga ma aumea mamae. Faapitoa lava foi ia i latou e fiafia i le tatou itulau masani – Samoa Saili Malo.
Malo lava le soifua manuia, alo pea lo tatou sa ma taulai le silasila i le Atua ina ia auomanū ai la tatou folauga, ma taitai atu seia aulia ai ma le manuia le faaiuga o lenei tausaga ma ona laasaga uma.
Ae alo maia, o le isi vaega faaopopo lenei, ma le faaauauina o le talaaga o le tamaitai, le Afioga Vaimasenuu Zita Sefo-Martel.
Na muamua ta‘u atu le tulaga o galuega faavaitaimi sa ia galue ai e lē gata i Samoa, a o le tele foi o isi atunuu o le lalolagi sa faapea ona maua le avanoa e asia ai ma faamautu ai mo ni vaitaimi lē tumau.
E pei ona sa ta‘ua i le vaiaso talu ai, o mafuaaga o fesuiaiga o galuega ma a‘oa‘oga ona o le tele lava o tiute ma galuega sa valaauina ai o ia ma lona aiga.
O ni avanoa e lē au maua, peitai sa maitauina le faaaogāina tatau o ia avanoa a o iai i totonu o galuega ma atunuu e pei ona sa silasila i ai.
Soifua galue/Galuega faapolofesa
Housing New Zealand
O le tausaga e 1985 sa faato‘ā ulufale ai i totonu o le galuega tumau, ma o le matagaluega o fale a le malo o Niu Sila, sa galue ai i le mae‘a ai o tausaga sa iai i le Iunivesite a Canterbury.
E tasi le tausaga sa galue ai mo le matagaluega o fale, a o le taimi foi lea sa galue ai faavaitaimi lē tumau mo le leitio a Niu Sila lava, (Radio NZ) e pei ona ta‘ua i le vaega muamua i galuega faavaitaimi.
O le faaiuga o le tausaga lava lea, sa malaga ai i Samoa ma faaipoipo ai i se alii Falani, ona toe foi mai lea i Niu Sila ma faaauau pea le galuega sa tautua ai. O Setema o le tausaga e 1986 na tuua ai Niu Sila ae agai i Montreal i Kanata ma le aiga.
O le vaitaimi foi lea sa a‘oa‘oina ai le gagana a ia atunuu e pei ona faamaonia i le taimi o a‘oa‘oga.
O le 1987 sa tuua ai Kanata ma Falani, ae toe malaga i Caribbean ona o se galuega sa ofoina ane e se tasi o kamupani faavaomalo mo le tamā o le aiga.
E lua tausaga sa iai i lea foi itu o le lalolagi, i lea foi taimi sa maua ai le galuega e faiaoga ai mo le gagana Peretania i le a‘oga a tamaitai a le Ekalesia Katoliko.
