E fetaui lelei le taunuu mai o le asiasiga faale-Malo a le Alii Palemia o Niu Sila ma Minisita o lana Kapeneta, Faipule o le Palemene atoa ai ma tagata faipisinisi ma tagatanuu o Samoa ma isi motu o le Pasefika o loo nonofo i Niu Sila i lenei vaiaso, ae o loo ua tumutumu foi Samoa i le tele o isi faigamalaga taua o loo talimalo ai Samoa.
Fesoasoani a Niu Sila…
O le faigamalaga a le Alii Palemia o John Key ua aumai ai ma ni tala fiafia o le siitia ai o le fesoasoani faaletausaga ua faamatuu mai e Niu Sila mo Samoa e amata atu i le tausaga nei seia oo i le tausaga e 2011.
O lea ua sii atu i le 14 miliona tala Niu Sila (20 miliona tala Samoa) mo lenei tausaga, o le tausaga fou o le a faaopoopo le isi miliona tala ia maua ai le $15 miliona tala Niu Sila (22.5 miliona tala Samoa) ma le tausaga e 2011 lea ua taua e John Key o le a maua ai e Samoa se fesoasoani e tusa ma le 17 miliona tala Niu Sila (tusa ma le 23 miliona tala Samoa). Na aumai ai foi ma fesoasoani o fualaau o le Tamiflu mo le puipuiga o Samoa mai i le siama o le H1N1 le Swine Flu.
O le atinae o pisinisi tumaoti lea foi ua siitia, o aoaoga aemaise o pili o fanau e le lava le faasoa a matua faapea ai le faaleleia o puipuiga a Samoa e ala i tiutefai a Leoleo o loo tele i ai le fesoasoani lenei.
Fesoasoani a Amerika…
O loo faagasolo foi i lenei vaiaso fesoasoani e pei o tautua faafomai fatu, nifo, mata ma isi vaega uma o le tino, o inisinia o masini computers ma inisinia o taavale ma le anoano o fesoasoani o fualaau ma vailaau o togafitiga faafomai, o mata tioata aua le ofo atu mo tagata lautele o Samoa. O se fesoasoani tele ua aumai e le malo o Amerika mo atumotu o le Pasefika.
Talu mai le galulolo (tsunami) lea na fano ai le toatele o tagata o Asia, ua faamalosia ai nei le fesoasoani faaletausaga lenei a Amerika i Asia ma le Pasefika. E le gata la i le fesoasoani ua ofo mai e fomai ma inisinia, ae ua faapea foi ona aumai ai ma vailaau mo togafitiga o tagatanuu o lenei itulagi.
Fesoasoani a Pisikoa…
O loo faagasolo foi i Savaii fesoasoani o togafitiga mai ni fomai mata se toavalu mai Amerika – O alii ma tamaitai fomai o loo faatautaia lenei fesoasoani o ni tagatanuu o Amerika na galulue i le amataga o le vaitau o le 2000 ma ua toe foi mai e ofo mai le fesoasoani, o se auala na o latou taua ua toe taui atu ai le agalelei o tagata Samoa a o nonofo ma galulue ai i lea vaitau o lo latou soifua.
Na o latou faaalia foi o le tasi lava lea o faafitauli na o latou maua a o nonofo ai i Samoa o le toatele o tagata aemaise i latou e nonofo i nuu i tua o le atunuu e maua i gasegase o mata ae e le o maua se fesoasoani e pei ona maua e i latou o loo nonofo latalata i le taulaga lea o loo tele fesoasoani faafomai mata o loo maua ai.
O loo faagasolo lava la a latou fesoasoani i nuu i tua o le motu tele i Salafai. Mo gasegase e faigata ona maua fesoasoani i Samoa nei, ua taua e nei fomai o le a ave sao lipoti mo taotoga i Amerika e ala atu ia latou fesootaiga.
