O le vaiaso lenei e faagata ai le lesitala o suafa o le au palota auā le palota tele o le tausaga fou.
O le tumutumu ua vaaia i le Ofisa o Faiga Palota ua mautu ai lava le faagaulemalie o le Ofisa o Faigapalota, talu ai le tuai ona oo atu o le atunuu e faamautu a latou lesitala.
Ae o loo iai nisi ua faaalia le popolega e toatele lava tagata e mae‘a le aso faatapulaa e lei lesitala lava.
O le faamatalaga a le Ofisa Sili o Faigapalota le Afioga Tanuvasa Isitolo Lemisio, o le a vaavaai lelei lava le Ofisa o Faigapalota i le molia o soo se tasi e lei faamautu mai lesitala mo le Faigapalota tele a le atunuu.
Faaalia e le Ofisa Sili o Faigapalota, ua atoa lelei le tausaga o taumafai e faalauiloa le tatau ona vave oo mai o tagata uma e lesitala ae o lea lava e faatali i le taimi mulimuli.
Ae o le vaiaso na tea nei i le fono a le Kapeneta na laga ai e nisi o Minisita le popolega i nisi o nei faasalalauga aemaise le faasalalauga mulimuli ua atoa nei le lua vaiaso o faasalalau o loo faapea mai, o le aso 6 o Novema o le a faamuta “lē tumau” ai lesitala o le faigapalota.
O le popolega o nisi o sui o le Kapeneta ona o le faaupuga “lē tumau” ua faapea ai tagata e iai se isi taimi i luma mai o le aso o faigapalota o le a toe tatala ai lesitala.
O le uiga sa‘o o le faasalalauga, o le upu “lē tumau” e faasaga i le toe tatala o le lesitala i tagata palota pe a mae‘a le faigapalota tele ia Mati o le Tausaga Fou.
Ua fautuaina nei le Ofisa o Faiga Palota ina ia toe suia lea faasalalauga ma ia mautinoa e tagata palota e uma loa le aso 6 o Novema, uma loa le taimi e lesitala ai ma ono faasala ai loa i le tulafono.
Ua tatala avanoa mo o‘o, lea ua ta‘ua e Tanuvasa Lemisio, ona pau lava lea o le tu ma le aga faa-Samoa e faataga i sauniuniga a sui tauva mo le faiga palota.
E na o le tasi foi le o‘o e mafai ona momoli i se nuu – o lona uiga a valu nuu e i totonu o le itumalo e valu foi o‘o e momoli, ae e matuā faasā le valu o nuu ae tufa atu ai ma nisi teutusi i tagata taitoatasi.
O le popolega o le tele foi o faamasinoga mulimuli ane pe a lipoti e nisi ia ituaiga faiga.
O le tamomoe foi o sui tauva e feaveai sui palota mo le faatinoga o a latou palota o loo faataga ae e ave loa se tupe mo se taumafataga poo se pasese o se sui tauva ona afaina loa lea i le tulafono.
E ui i lea lapataiga ae ua ta‘ua e nisi o sui tauva e fiu e taumafai lea tulaga a ua amata ona laina tagata i ofisa o sui tauva, talu ai le manaoga ina ia avatu ni tupe.
E eseese lava mafuaaga, o pili o tamaiti, o fesoasoani mo faalavelave e pei o maliu ma faaipoipoga.
O le faamatalaga a le Ofisa Sili o Faigapalota, e tele lava faafitauli e ono tulai mai pe a lē mafai e sui tauva ona taofiofi tagata e agai atu ona o le mananao i seleni mai i sui tauva.
O le iuga lava o le ave o mataupu nei i le faamasinoga, ma o tagata lava foi nei e molituina sui tauva i le Faamasinoga ma lē maua ai nofoa o itumalo o loo taumafai uma i ai alii ma tamaitai ua fia tulai mai o faipule o le Itumalo o Samoa.
