O le faamanatuga o lenei aso i le lalolagi ua patino lava i le suavai peitai o Samoa ua faaopoopo i ai ma le faatāua ua ave i le vaomatua.
Ua tele masina o faatino aoaoga i sui o afioaga o le atunuu o loo iai togavao tetele ma faasao o le vaomatua ona o le manaoga ina ia malamalama tagata o afioaga nei i nofoaga e tatau ona faatino ai galuega faasao.
O le toatele lava o afioaga e matuā lē manino lava i vaega eseese o o latou vaomatua ma o aoaoga na sa faatino, ina ia iloa e nuu uma o latou vaomatua aemaise o fea vaega ua faaleagaina ina ia agai i ai le toe totō ma le toe faaleleia aemaise foi o vaitafe o loo iai.
O le alasima i Vaisigano na faatino ai le galuega faalauiloa e ala i se sauniga na auai atu i ai le malo, o sui o le Palemene atoa ai ma sui o afioaga ma le Matagaluega o Punaoa Faale-Natura ma le Siosiomaga ma le Pulega o le Suavai. O le fesootaiga o faigata na vaaia i lenei ala laupapa i taimi o lologa o le afa o Eveni lea na faapea ona toe faamanatu i lea sauniga aemaise ai galuega toe faaleleia ua unai pea i lea itu o le talafatai o le taulaga.
O lea ua faamautu le galuega o le a toe faia e lē gata i le toe fausia o le alasima lenei ae o le fausia o taligalu i autafa atoa o le alasima lea seia oo lava i le pito i uta i Matautu agai atu i Faatoia ma Maagao faapea ai Magiagi.
O le suavai e pei lava ona vaaia i vaomatua o Samoa, e manaomia tele le lelei o vaomatua e taofiofia lenei Punaoa faalenatura auā o le leai o ni laau o le vaomatua, o le solo foi lea o le palapala ma faaleaga uma ai vaitafe.
O le vaomatua e pei lava ona silafia o le ola o soo se nuu ma ua tele ina tua i ai i le faatino ai o faatoaga peitai o le soona faaaogā lea e tagata ma ua ta i lalo laau ona o faatoaga ua vaaia ai le tele o vaomatua e lē o toe maua laau e tatau ona maua ai ma sola ai le tele o manulele o Samoa lava ia sa faapea ona ofaga ma avea nei nofoaga ma o latou siosiomaga.
O le galuega la lea ua faia nei e lē gata ina puipuia atoa vaomatua, toe totō laau ma ia faamamā uma vaitafe o loo faapea ona maua mai ai. O le tele o afioaga ua oo i ai le Matagaluega o Punaoa faalenatura ma le Siosiomaga, ua mafai ona talanoa mai nei i faasao ae ua malamalama i nei nofoaga auā ua mae‘a ona iai ni faafanua ua tuufaatasia e nuu uma mo le silafia o le lautele i o latou vaomatua.
Sa faamalosia le agai atu o sui o afioaga nei e fua lelei lava le vaomatua ma ua fai ata faataitai nei mo le afioaga ina ia iloa lelei lava le faataatiaga o o latou tuamaota ma vaomatua.
E oo mai i le aso o loo tele lava galuega toe faaleleia e lei mae‘a i nofoaga ia na matuā afatia i lologa i le atu Vaimauga ma o lea lava la e faagasolo galuega ma faamanatu i le nofo sauni lelei ai o afioaga i taimi e toe tulai mai ai faalavelave faapenei.
Ua manino foi le toatele o le gaioiga lava a le tagata ua tele ina faaleaga ai le siosiomaga e pei o vaomatua lea la ua toe agai e fai i ai se faiga ina ia faaleleia auā o gauta lava ua tele ina agai i ai tagata e faamautu ai ona o le afatia o nofoaga maualalalo.
O le faamanatu ai o le aso o le suavai na ave ai le faatāua i le tele o nofoaga e oo mai lava i le aso e lē o maua le suavai mamā.
Ae o le sauniga lenei na faapea ona faamautu ai ma se fuafuaga a le Malo ina ia amata totō laau e 2 miliona mo le taimi lenei seia oo atu i le isi lima tausaga i le tausaga e 2020 ma o se vaega o le taumafaiga lenei ina ia unai le malosi o le vaomatua ma ia faamautu ai ma le puipuiga o vaitafe.
