Talofa lava. E iai le manatu maualuga o loo e manuia i le tausiga o lo tatou Tama i le lagi.
Ia alo maia o le faaauauina foi lenei o le tatou suesuega i le tusi o Faaaliga. O lea ua tatou iai i le mataupu e 17.
O se tasi o agelu e fitu e ua sau nei ma talanoa ia Ioane ma fai i ai “sau ia, ou te faailoa atu ia te oe le faasalaina o le fafine talitane e sili o le tietie i vai e tele. Ua faitaaga ma ia o tupu o le lalolagi”.
O le upu o le faitaaga e sau mai le upu o lona uiga o le ‘faatau atu’. O le faitaaga i le Tusi Paia aemaise le Feagaiga Tuai e iai lona uiga faaleagaga o le faitaaga. O le faitaaga ma le mulilua e faatusa i tagata o le Atua ua avaga faaleagaga i mea o le lalolagi ma le tiapolo.
O le faatusaina le galuega faatalitane a le fafine e ala lea i le tele o tagata ua tosina atu i le auala ua faatautaia ai le lalolagi aemaise o tapuaiga e pei ona taiulu ai le manufeai. E le o faatusaina o ia i se ekalesia se tasi, ae o tagata lolotu ua tuuina atu o latou tino ma o latou loto atoa i le tiapolo. Ua le faamaoni i le va ma le Atua ae ua faitaaga i le itu faaleagaga ma le pule a le manufeai.
Talosia i le fesoasoani mai o le Atua ina ia taofia mai ai le toatele e solo atu i le la faafanoga ma le faitaaga faaleagaga ua mamao ai le toatele mai le Atua.
O le fafine Talitane e pei ona taua o loo tusia i lona muaulu ona igoa:
Muamua e ‘lilo lona uiga’: E foliga mai e lei vaaia muamua pe iloa muamua o ia.
Lona lua o ‘Papelonia le Aai Tele’. O ia lenei e aafia i le polokalame a Satani lea e iai le perofeta pepelo ma le Anetikeriso.
Lona tolu o le ‘Tina o fafine Talitane’. E pei ona taua i luga o le ata lea o le fafine talitane e faamatalaina ai le alu ese o le tagata mai le mafutaga ma le Atua ae faasaga atu i isi atoa ma isi tapuaiga. E pei o se faatusa i se tagata ua tuua lona toalua moni ae avaga atu i isi.
O le ata lea o loo faamatalaina ai le o ese o tagata o le Atua i le taimi o Ieremia. E pei ona faailoa e Ieremia e faapea “Ua e talitane i tane e toatele, a ia e toe foi mai ia te au, ua fetalai mai ai le Alii” (Ieremia 3:1, 6, 9). Silasila i le Hosea 1:2.
Sa faapea foi ona faaaogaina e Hosea (1:2) lenei faaupuga atoa ai ma Esekielu (16:28) e faailoa ai le iai ia Isaraelu o lona pulea faamalosi e Asuria e pei ona tupu i le tausaga e 722BC.
O le vagea lona fa o le igoa o le fafine talitane e faamatalaina faapea ‘o le mea inosia i le lalolagi’ (5)
O le fafine talitane poo le faatusa o mea e inosia e le Atua e foliga mai o le a faateteleina lona malosi ma ana faiga a o agai ina faataunuuina le polokalame faataatia a le Atua mo le lalolagi.
O loo taua e Ioane le tamaoaiga o le tamaitai e ala i ana teuga (4). E tele ana mea ma mauoloa ma avea lea ma ala e tosina i ai tagata. E le taumatea lea tulaga aua o le tulaga o le a iai le lalolagi i lea taimi, e foliga mai e leai se Atua ona o mea tutupu. Ua faamaaa foi loto o tagata ma faifai i le Atua e pei ona tatou aoaoina i le vaiaso na tea nei. O le a tulai mai la o se tapuaiga e tele ana mea ma tamaoaiga o le a lolofi i ai tagata mo se fesoasoani ma atua i ai. (O le faitaaga poo le talitane lea o loo talanoa i ai Ioane).
O le lima o le fafine o loo iai le ipu auro e tumu i mea e inosia ma leaga o lana faitaaga. O ai e inosiaina nei mea? O le tali o le Atua. O tua atu o le talitane e tupu ai ma isi agasala … Ina ua talitane le fanauga a Isaraelu ma atua ese i le Feagaiga Tuai na latou faataunuuina ai ma tu ma aga a atua o nuu ese. O nisi o nei mea e inosia e le Atua e pei o le faaaogaina lea o a latou fanau e osi ai taulaga i atua o nuu ese (2 Nofoaiga a Tupu 28). O nei ituaiga o tapuaiga ua avea ma mea e matua inosia lava e le Atua.
O se tasi o mea na maitauina e Ioane e uiga i le fafine talitane i le fuaiupu e 6 e faapea, “Na ou iloa foi le fafine ua ona i le toto o le au paia ma le toto o e na molimau ia Iesu”.
Na matua ofo tele Ioane i le mea ua ia vaaia ona fai atu ai lea o le agelu ia te ia “Se a le mea e te ofo ai, ou te tau atu ia te oe le uiga o le mea lilo o le fafine…
O le faamatalaina o lenei mea e le o se mea faigofie. E taofi eseese foi tagata e uiga i le faamatalaina o le vaega lenei o le Tusi o Faaaliga.
O le a o tatou vaavaai i fuaiupu taitasi e faafaigofie ai ona tau maua se malamalamaga e uiga i le faamatalaga a le agelu ia Ioane.
O le fuaiupu e 8 o loo talanoa i le manufeai, “o le manufeai na e iloa, sa iai, ua le iai foi, o le a alu ae nai le to e le gata e alu atu foi o ia i le malaia…” O le vaega lenei o loo faatatau i le oti o le anetikeriso ma le toe ola mai e pei ona vaaia i le mataupu e 13.
O le anetikeriso o le galuega lea a le tiapolo e taumafai e faataitai ia Keriso. E pei ona maliu ma toetu mai Iesu Keriso, e faapea le mea na faia e le tiapolo ina ia faailoa ai lana pule ma mea e mafai ona ia faia.
Na faailoa mai e le Agelu o le manufeai o le a alu atu i le malaia. O le uiga o le upu malaia o le faasalaga.
I le Luka 22 tatou te iloa ai o Iuta sa iai le agaga o le tiapolo.
O ia se anetikeriso poo se tagata e faatautee i le Keriso. Fai mai le mau a Luka na ulutinoina e Satani Iuta na mafua ai ona ia faalataina Keriso.
I le Ioane e 6:70 na fetalai ai iesu ia Iuta ma ia fai atu “o se tasi o outou o le tiapolo ia”. Na faaigoaina e Iesu Iuta o le ‘atalii o le malaia’ (Ioane 17:12).
O le vaiaso a sau o le a tatou auiliiliina ai le faamatalaina o le manufeai e fitu ona ulu.
E ui lava e foliga mai o loo tele le tatou suesuega ma le talanoaga i le manufeai ma le tiapolo i lenei vaiaso, ae aua nei galo ia faamuamua pea Keriso i o tatou loto ma outou finagalo. O ia o le auga o aute ma autu o le Tusi o Faaaliga, aua i le faaiuga o ia lava e toatasi e manumalo.
Ia faamanuia le Atua i feau o lenei vaiaso.
