A o agia pea i talatalanoaga ma finagalo le tāua o le itupa o Tina, ma le matagofie o lo latou Aso Sa na faatoa mavae atu, e ao lava ona faaauau pea le faatauaina o o latou tiute fai e le gata i totonu o aiga, faalapotopotoga, Ekalesia aemaise o nuu ma afioaga.
O se itu matagofie foi lea i le taimi o le Koneferenisi a tina ma tamaitai a le Ekalesia Faapotopotoga a le Atua (A.O.G.) a Vitoria ma Melepone ona e faatino i le vaiaso tonu o le mae‘a ai o le Aso Sa o tina i tausaga taitasi.
O le agaga ina ia toe faaauupegaina atili pea tina ma tamaitai i le upu a le Atua, aemaise o le fauina o mafutaga mafanafana ma isi tina, ina ia malosiau ai pea e ala i le tutu faatasi ma opogi faatasi tusa lava poo le a le eseese o tu ma agaifanua, aganuu ma masani, aoaoga ma valaauina, ia tasi pea le loto ma le faamoemoe ia tasi.
E eseese atunuu na tupuga ma soifua ane ai, eseese le lanu o tino eseese foi gagana, ae ua avea Melepone ma o latou nuu ma aiga, avea foi le AOG ma a latou Ekalesia, ua tasi ai le talitonuga, ma ua aiga e tasi tina uma ma tamaitai o le Ekalesia.
Ua maitauina le faatupulaia o le fuainumera o tina ma tamaitai atumotu o le Pasefika i lenei faamoemoe, e aofia ai ma tina Samoa, o loo naunau e galulue faatasi ma isi tina, aua poo le a lava lo ta malosi, e iai lava le taimi ta te vaivai ai, ona manaomia lea o le fesoasoani a le isi tina.
E to‘a 3 failauga valaauina na feagai ma le Upu folafola, o se faifeau tamaitai mai Amerika, faifeau tamaitai mai le Hillsong i Sini, ma le faletua o le Peresitene o le A.O.G. aoao a Vitoria. E
silia ma le afe tina ma tamaitai sa faatumulia ai le malu o le Ekalesia a Enjoy i Sunshine, i le Aso Faraile 18 o Me, ma le Aso Toonai 19 sa fai ai le Koneferenisi.
