O le Pule faitoatasi a le Atua, o le ma‘ata e lē alofia, o le maa togi faato ma le ti‘a lava e lē seua. Ua sautia le ‘au matatao ma ua motu le soa ina ua usuia le fono i le Manuoletuasivi e fagota i tai e lua, le fetalaiga ia Taituuga Lepau Ioelu.
Na faamānavaina ana galuega i le aoauli o le Aso Gafua, aso 8 o Oketopa 2012. O se tasi o Ao Sinasina, poo se tamā matua e iloga foi i meafai a le Ekalesia e ala i lona soifua tautua lotu auā le galuega a le Atua faapea le tausi aiga lelei.
O se tasi o ona alalafaga e iloa ai o ia i Samoa o Sapunaoa Falealili. O le tamā matua o se mamoe a le Ekalesia Samoa New Life Christian Fellowship lea o loo galue ai se tasi o ona alo, le susuga ia Pastor Faifaimalie Lepau Ioelu ma le faletua.
E ui ina ufitia le nofoaalo ma aiga i le ao pogisa, peitai, o Afioga Paia a le Atua, i valoaga o le lagi ma le lalolagi fou “E soloi esea foi e le Atua loimata uma i o latou mata, e leai foi se toe oti poo se faanoanoa, poo se aue e leai foi se toe puapuaga….” O lou oti foi, o lou manuia lea, a o lou ola ua ia Keriso lea!
O le afiafi o le Aso Sa na faia ai ona sauniga faaleaiga i le malumalu EFKS SOUTH WEST i Acacia Ridge i lalo o le faamalumaluga a le Susuga i le Toeaina ia Rev Tauaaga ma le faletua ia Senerita Mataafa.
Sa fai sao ai nisi o faafeagaiga ae sa faapea ona taitaia le po e lana auauna poo le taitai lava o le Ekalesia Samoa New Life Christian Fellowship i Brisbane lava.
O le fetalaiga ia Tuiloma Faiaga Puletiuatoa sa fai ma fofoga o aiga i le sauniga faaleaiga i le afiafi o le Aso Sa.
O le taeao o le Aso Gafua, sa faia ai ona toe sauniga ma molimoli atu ai i lona oliolisaga tumau i le fanua maliu i Mt Kalaveti, ma taualuga ai foi i se taumafataga faapea faaaloaloga ma se matū palapala sa faatinoina e aiga na lua auā Samoa potopoto…
Faamaise le Atua i le nofoaalo ma aiga faanoanoa.
